87 saylı Ağsu-İsmayıllı seçki dairəsindən deputat, Mərkəzi Univermağın (MUM) rəhbəri Ərəstun Cavadovun yenidən deputatlığa namizədliyini irəli sürməsi Ağsu rayonunda əhalini qəzəbləndirib.

Bu barədə Xalqxeber.Az-a Ağsudan bir qrup rayon sakinləri məlumat veriblər. Rayon sakinləri qeyd edirlər ki, əhalinin Ərəstun Cavadovun yenidən namizədliyini verməsindən qəzəblənmələri əsaslıdır: "Ərəstun Cavadov 2005-ci ildə və 2010-cu ildə Ağsu rayonunun deputatı olduqdan sonra rayonda yerli əhalinin, fermerlərin, iş adamlarının günü qara olub. Belə ki, Ərəstun Cavadov MUM-dan əldə etdiyi milyonlarla kifayətlənməyərək rayonun icra başçısı ilə birləşib Ağsuda bir çox biznes sahələrini ələ keçirib. Obyektini ucuz qiymətə satmaqdan imtina edən sahibkarları vergi və digər orqanların əli ilə müflisləşdirib. Çıxılmaz duruma düşən sahibkar görəndə ki, obyektini işlətməsi mümkün deyil, Ərəstun Cavadov-icra başçısı cütlüyünün təklifinə razılaşmalı olub. Rayondakı ticarət, iaşə obyektlərinin əksəriyyəti bu beş ildə faktiki olaraq bu şəkildə Ərəstun Cavadovla, icra başçısının nəzarətinə keçib”. Xalqxeber.Az xəbər verir ki, təkcə müəssisələri, ticarət obyektlərini deyil, əhalinin, fermerlərin üzüm plantasiyalarını da zorla ələ keçirən deputat-icra başçısı cütlüyü Ağsu əhalisini çörəklə imtahana çəkir. Artıq elə vəziyyət yaranıb ki, əhali hökumətə qarşı üsyanın bir addımlığındadır: "Üzüm plantasiyası, ticarət obyekti əlindən alınan yüzlərlə ailə artıq əlində olan-qalan vəsaitini də yeyib qurtarıb. Ona görə də artıq faktiki olaraq çörəyə möhtac vəziyyətə gəlib düşüblər. Balası ac qalan valideyn isə məlumdur ki, hər dəqiqə üsyana qalxa bilər. Bu gün Ağsu rayonunda minlərlə valideyn bu vəziyyətdədir. Camaatın səbir kasası dolub. Artıq Ağsuda yaşamaq mümkün deyil. Onlar ölkə rəhbərliyinin onları Ərəstun Cavadov-Ənvər Seyidəliyev cütlüyündən tezliklə xilas edəcəyini gözləyirlər. Faktiki olaraq bu iki şəxs Ağsu əhalisində hakimiyyətə də qəzəb yaradıblar. Bu qəzəb getdikcə artır. Hakimiyyət tezliklə tədbir görməsə, inanın ki, Ərəstun Cavadovla icra başıçısı Ağsuda böyük üsyanın alovlanmasına səbəb olacaqlar. Əhali eşidəndə ki, Ərəstun Cavadov yenə də deputatlığa namizədliyini verib narazılıq bir qədər də şiddətlənib”. Rayon sakinləri xüsusilə qeyd edirlər ki, 2010-cu ildə keçirilən parlament seçkilərində də Ə.Cavadovun əhalidən imza toplamayıb: İcra başçısının göstərişi ilə ona lazım olan sayda vətəndaşın şəxsiyyət vəsiqələrindəki göstəriciləri imza vərəqələrinə köçürüb DSK-lara veriblər. DSK-lar isə icra hakimiyyətindən gələn əmrə müntəzir olaraq onu qeydə alıblar. O, əslində saxta namizəddir. Ağsu əhalisi daha beş il bu fəlakəti yaşamaq istəmir. Azərbaycan prezidenti İlham Əliyevə bunun üçün müraciət göndəriləcək”. Redaksiyamıza başqa bir mənbədən verilən məlumatlarda isə bildirilir ki, Ərəstun Cavadov Mərkəzi Univermağın rəhbəri kimi də qanun pozuntularına yol verib. Onun ölkənin qızıl bazarının inhisara almasından, saxta materialdan zərgərlik məmulatları hazırlayan zərgərlik sexlərinin olmasından, aylıq dövriyyəsi milyon manatlarla ölçülən MUM-ın dövlət büdcəsinə vergi olaraq nə qədər vəsait ödədiyindən, vergidən hansı maxinasiyalarla yayınmalardan, MUM-da işləyənlərin hansı şərtlərlə işlədildiyindən faktlara əsaslanan söz açılır. Daha bir məlumatda isə bildirilir ki, Ərəstun Cavadov Əli İnsanova son dərəcə yaxın olan və hazırda deputat mandatı daşıyan məşhur bir şəxslə keçmiş əlaqələrini hələ də davam etdirir.

Ə.Cavadovun deyilənlərlə bağlı mövqeyini dərc etməyə hazırıq.