“Bu iş həll edilməsə, özümü yandıracağam”

Lerik rayon sakini Eldəniz Quliyev Teleqraf.az-a yazaraq 60 sot torpağının icra başçısı Rövşən Bağırov və deputat İqbal Məmmədov tərəfindən zorla alındığını bildirir:

Teleqraf.az-ın xəbərinə görə,  Lerik Rayonu, Nəriman Nərimanov küçəsi ev 21-də yaşayan Eldəniz Şadkamal oğlu Quliyev dövlət qurumlarından kömək istəyib. O bildirib ki, onun 60 sot qanuni sənədi olan həyətyanı sahəsini Lerikin icra başçısı Rövşən Bağırov və rayondan deputat olan İqbal Məmmədov zorla ondan alıblar: “Lerik rayonunda 60 sot qanuni mülkiyyətimi zorla əlimizdən alıblar. Bunun səbəbi odur ki, mənim torpağım dövlət əhəmiyyətli obyektin tikintisi üçün plana düşmüşdü. Bunun müqabilində mənə kompensasiya vermədilər".

Vətəndaş bildirir ki, torpağını zorla əlimizdən alan Lerikin icra başçısı Rövşən Bağırov və Milli Məclisin deputatı İqbal Məmmədovdur. O, bununla bağlı dəfələrlə şikayət etdiyini, lakin şikayətlərinin heç bir nəticə vermədiyini iddia edir.

E.Quliyev bildirib ki, məsələni ictimailəşdirəndən sonra deputat İqbal Məmmədov onu təhdid edib: "Mən öz hüquqlarımı qorumaq üçün bu məsələni ictimailəşdirmək istəyirəm. Əvvəllər də bunu etmişəm, amma rayonun deputatı İqbal Məmmədov bir müddət əvvvəl mənimlə telefon əlaqəsi yaradaraq “səni aradan götürərəm” deyə təhdid etdi. Hətta nalayiq küçə söyüşləri ilə məni təhqir etməkdən çəkinmədi. 75 yaşlı anamı – Əliyeva Xoşqədəm Şövqi qızını təhqir elədilər. Axşam saat 17:08 radələrində 2-ci dəfə anonim zəng edərək, bu məsələni böyütsəm, məni öldürəcəklərini bildirdilər”.

Şikayətçi həmçinin ailəsinin yaşadığı ağır güzərandan və başına gələn müsibətlərdən də danışıb : “15 ailə üzvümüz var. Ümidimiz o torpaq sahəsi idi. Əkinimizi viran, bizi müflis etdilər. Qardaşım – 1968-ci il təvəllüdlü Quliyev Tahiri rayon deputatı İqbal Məmmədov qohumları vasitəsi ilə şər atdıraraq həbs etdirdi. Onun qohumları icra hakimiyyətində və polisdə işləyir. Bu məsələdən çəkindirmək üçün hər gün bizə hədə-qorxu gələn anonim zənglər edirlər”.

Vətəndaş həmçinin icra başçısını və deputatın təzyiqlərindən bezərək özünü yandıracağını da istisna etmədi: " Faktiki rayon icra hakimiyyətinin başçısı Rövşən Bağırov və deputat İqbal Məmmədov Azərbaycan Respublikasının Mülki Məcəlləsinin 245 246 247 -ci maddələrini kobud şəkildə pozub, bizim hüquqlarımızı tapdalayıblar. Ailəmizin razılığı olmadan torpaq sahəmizi "Azərenerji"nin rəhbəri Etibar Pirverdiyevə satıblar. Orada əkdiyimiz taxıl zəmisini texnikanın qabağına verib məhv ediblər. Mənə deyirlər ki, prezidentin sərəncamı var və biz bu ərazini almalıyıq. Amma mənə heç bir kompensasiya ödəmirlər. Əgər bu təzyiqlər davam edərsə, özümü azyaşlı körpələrimin gözü qarşısında İcra Hakmiyiyyətinin qarşında yandıracam. Bizi özümüzü öldürmək həddinə çatdırıblar. Bu məsələdə hər zaman haqq sözünü deyən, hüququ pozulanların arxa-dayağı olan insanlardan, ölkə rəhbərliyindən, mətbuatdan kömək istəyirəm. Xahiş edirəm, 75 yaşlı anamın və körpələrimin ah-naləsini yerdə qoymayın".

Vətəndaşın iddiaları ilə bağlı yazıda adıçəkilən şəxslərin də mövqeyini dərc etməyə hazırıq.