Azərbaycanda avtomobillərin mühərrikinin iş həcminə görə sürücülərdən alınan yol vergisi yanvarın 1-dən ləğv olunur.

  Teleqraf.az axar.az-a istinadən  xəbər verir ki, Vergi Məcəlləsinə edilən dəyişikliklə yanacaq üçün yol vergisi tətbiq ediləcək. Bundan sonra yanacağı istehsal edənlər və ölkəyə gətirənlər hər litr üçün 2 qəpik dövlət büdcəsinə ödəməli olacaqlar.

 Amma bu dəyişiklikdən sonra yanacağın satış qiymətinin artıb-artmayacağı sual altındadır.

 Yol hərəkəti üzrə ekspert Ərşad Hüseynov Axar.az-a açıqlamasında mövcud dəyişikliyin yanacağın qiymətinə təsir edəcəyini bildirib:

 “Sürücülər illik texniki baxışdan keçərkən yol vergisi ödəyirdilər. Bunun ləğvi sürücülərin xeyrinədir. Bu il Azərbaycan sürücülərindən və nəqliyyat vasitələrindən alınan yol vergisinin məbləği 69,5 milyon manat olub. Yeni dəyişikliklə dövlət gələn illər üçün bu məbləğdən imtina edir. Amma bu çox da real görünmür. Yanacağı istehsal edənlər və ölkəyə gətirənlərin hər litr üçün 2 qəpik dövlət büdcəsinə ödəməsi inandırıcı deyil. Böyük ehtimalla, həmin məbləğ başqa bir variantla sürücülərdən alınacaq. Yanacağın qiymətinin minimum 5 qəpik qalxması gözlənilir”.

 İqtisadçı ekspert Natiq Cəfərli də mövcud dəyişiklikdən sonra yanacağın qiymətinin qalxacağını deyib:

 “Gələn il Azərbaycan Respublikası Dövlət Neft Şirkəti neftin qiymətinin enməsi fonunda 400 milyon dollar itirəcək. 2015-ci il üçün nəzərdə tutulan bu itkidə neftin qiyməti 60 dollardan hesablanıb. Bu gün isə neftin qiyməti 57 dollara qədər enib. Təkcə neftin bir barrelində 3 dollar geriləmə Neft Şirkətinə milyonlarla dollar ziyan deməkdir. Vergi Məcəlləsinə edilən dəyişikliklə ARDNŞ-in yanacaq üçün 2 qəpik yol vergisi ödəməsi inandırıcı deyil. Həmçinin Azərbaycanda xeyli sayda özəl yanacaqdoldurma məntəqələri var və bu məntəqələrin də əlavə vergi ödəməsi real deyil. Çox güman ki, məsələnin çıxış yolu yanacağın qiymətinin qalxmasında görüləcək və yol vergisinin ləğvindən itirilən məbləğ yanacağın qiymətinin qalxması ilə kompensasiya ediləcək.”

 Qeyd edək ki, yol vergisinin ləğvi Azərbaycan ərazisinə daxil olan və ölkə ərazisini tərk edən xarici dövlətlərin avtonəqliyyat vasitələrinə aid edilməyəcək.