22 sentyabr 2014. Qarabağ Azadlıq Təşkilatı Ağsuda məskunlaşmış məcburi köçkün, şəhid ailəsinə qarşı haqsızlıqlarla bağlı prezident İlham Əliyevə müraciət edib.

Müraciətdə göstərilir:  Şəhid ailəsi, Kəlbəcərdən məcburi köçkün Məmmədova Gözəl Süleyman qızına qarşı edilən haqsızlıqlarla bağlı Sizə müraciət edirik. Gözəl Məmmədovanın həyat yoldaşı Əli Məmmədov Qarabağ müharibəsində  fəal iştirak edib, döyüşlərin birində həlak olub. Gözəl Məmmədova 1993-cü ildən Ağsu şəhərində, “Qərənfil” uşaq bağçasında məskunlaşıb. O, rayonda fəal ictimai iş aparır, ədalətsizliklərə və nöqsanlara qarşı həmişə vicdanlı vətəndaş mövqeyi tutur, xüsusilə də, vətənpərvərlik işinin gücləndirilməsi istiqamətində  əlindən gələni etməyə çalışır, bu yöndə yol verilən nöqsanların aradan qaldırılması üçün təşəbbüslər edir.

 Çox təəssüf ki, rayon icra hakimiyyətinin rəhbərliyi qərəzli mövqe tutur, hətta mənəviyyatsızlığın o həddinə çatırlar ki, onun heysiyyatı ilə oynayır, təhqir edir, həyat yoldaşının şəhidliyini, özünün məcburi köçkünlüyünü lağa qoymaqdan da çəkinmirlər. Haqsızlıq o həddə çatıb ki, Gözəl Məmmədovanın məskunlaşdığı uşaq bağçasında rayon icra hakimiyyəti tərəfindən təmir işləri aparılır, orada məskunlaşmış bütün köçkünlərin otaqları təmir olunur, yalnız onun yaşadığı otağı təmir etməkdən imtina edirlər. Bununla şəhid ailəsindən intiqam aldıqlarını göstərmək istəyir, bu cür səviyyəsizlik və mənəviyyatsızlıq edirlər. Rayon rəhbərliyi “Şəhid ailələri haqqında Qanuna” uyğun olaraq onu nə evlə təmin edir, nə də yaşadığı otağı təmir edir.       

Ola bilər ki, bu, Sizə xırda məsələ kimi görünsün. Amma bu, elə-belə məsələ deyil, dövlətçiliyə, torpağa, vətənə münasibət məsələsidir. Bu cür haqsızlıqlar insanın əhval-ruhiyyəsinə mənfi təsir göstərir, vətənpərvərlik ruhuna zərbə vurur. Görün iş nə yerə çatıb ki, şəhid ailəsi, məcburi köçkün Gözəl Məmmədova bu haqsızlıqlara dözməyərək ölkə vətəndaşlığından imtina edərək, xarici ölkələrdən birinə çıxıb getmək istəyir.

İnanırıq ki, müraciətimizə diqqətlə yanaşacaq, bir şəhid ailəsinə, yurdundan didərgin salınmış bir məcburi köçkünə qarşı edilən haqsızlıqların aradan qaldırılması üçün tapşırıqlarınızı verəcəksiniz. Əvvəlcədən təşəkkürümüzü bildiririk.