Erməni idmançılarının Birinci Avropa Oyunlarında iştirak etmək məqsədi ilə Azərbaycana gəlməsinə etiraz olaraq Qarabağ Azadlıq Təşkilatı etiraz aksiyası keçirməyə cəhd edib.

Teleqraf.az-ın xəbərinə görə, 30-a yaxın QAT üzvü Qara Qarayev metrosunun yaxınlığına toplaşaraq “rədd olsun ermənilər” şüari ilə aksiya keçirməyə cəhd etsə də, aksiya keçirməyə imkan verilməyib. QAT üzvləri erməni vəhşilikləri ilə bağlı hazırladıqları müraciətləri ətrafda olan insanlara paylayaraq dağılışıblar.

Teleqraf.az-ın əməkdaşına, “erməni idmançılarının Bakıya gəlməsinə şərait yaradılmasını qınayırıq” deyən QAT Sədri Akif Nağı bildirib ki: “Ermənistan Azərbaycanın torpaqlarının böyük bir hissəsini hələ də işğalda saxladığı bir vaxt da beynəlxalq tədbirlər adı altında “gediş-gəliş” yaradılmasını düzgün hesab etmirik və erməni idmançılarının Azərbaycana gəlməsinə şərait yaradanları qınayaraq QAT-ın bütün rayon şöbələrinə etiraz aksiyaları keçirtmələri haqqında tapşırıq vermişik. Bizim ermənilərlə bir hesabımız var, o da döyüşərək torpaqlarımızı azad edib, şəhidlərimizin qisasını almaq.”