Partiya sədrləri hələlik bu tendensiyanın müşahidə olunmadığını deyirlər, amma...

Manatın ucuzlaşması və ərzaq və qeyri-ərzaq mallarının bahalaşması ölkədə əhalinin durumuna təsir edir. Eyni zamanda narazıların sayı getdikcə artır. Bu cür vəziyyətlər adətən istənilən ölkədə müxalifət mövqeyinə keçənlərin sayına təsir edir. Təcrübədə belədir ki, ölkədə narazıların sayı artdıqca, hakimiyyətə rəqib düşərgənin sıraları sıxlaşır.

Azərbaycanda bu proses müşahidə olunurmu, son vaxtlar müxalifət partiyalarına qoşulanlar varmı?  Bundan sonrakı dövrdə insanların müxalifət düşərgəsinə kütləvi keçməsi prosesi gedə bilərmi?

KXCP sədri Mirmahmud Mirəlioğlu bildirdi ki, əhalinin sosial-iqtisadi vəziyyəti pisləşdikcə, müxalifətə qoşulanların sayının artması həm nəzəriyyədə, həm də dünya təcrübəsində rast gəlinən təbii məsələdir. Azərbaycanda isə bahalaşma hələ əhalinin əksər təbəqəsinə gəlib çatmayıb, ona görə də qeyd olunan proses hələ görünmür: “Əhalinin hələ cibində son qəpikləri var, hələ özü üçün çörək, siqaret ala bilir. Hələ imkanlar var. Haqqında söhbət gedən proses Avropa Oyunları başa çatdıqdan sonra başlayacaq. Böyük bahalaşma da bu zaman başlayacaq, əhalinin narazılığı da, kütləvi müxalif mövqeyə keçmə də özünü bu zaman göstərəcək. Ölkədə bu kimi bütün proseslər olimpiadadan sonra olacaq. İndi bir sıra işlər görülür, tam bahalaşma yoxdur”.

Müsavat Partiyasının başqanı Arif Hacılı bildirdi ki, Müsavat Partiyası sıralarına Azərbaycan vətəndaşlarının daxil olması prosesi daimi bir prosesdir. Partiyanın son qurultayından sonra təşkilatın struktur fəaliyyəti güclənib: “Müsavat Partiyasının istər mərkəzi strukturları, istər yerli strukturları daha çevik, daha dinamik fəaliyyət göstərmək imkanları əldə edib. Bunun nəticəsində və səkkizinci qurultaydan, Müsavatda olan qeyri-müəyyənliyə son qoyulduqdan sonra partiya sıralarına üzvlərin qəbulunda real artım görünməkdədir. 

Azərbaycan müxalifətinin tərəfdarlar sayına görə problemi yoxdur. Sadəcə, xalq hansısa fəaliyyətin nəticəsində ölkədə ciddi dəyişikliklərin olacağına inanmır. Müəyyən tələbatları ödənən təbəqə vəziyyətdən narazı olsa da, vəziyyətə dözümlü yanaşmağa üstünlük verir. Hazırda baş verən siyasi, iqtisadi təbəddülatlarla müqayisədə ölkədə olan ictimai-siyasi vəziyyəti nisbi sakitlik kimi dəyərləndirmək olar. Ancaq bu sakitlik uzun sürməyəcək. Hesab edirəm ki, yaxın həftələrdə manatın devalvasiyası, aparılan kortəbii iqtisadi-siyasətin nəticələri əhalinin daha geniş kütlələrinə və daha böyük ziyan vurmağa başlayacaq. Aprel-may aylarından gec olmayaraq ölkədəki siyasi vəziyyət bugünkü durumdan əsaslı surətdə fərqlənəcək”.   /musavat.com/