Əsl adı Wee Meng Chee olan müğənni Namewee sonuncu klipində islam dinini aşağıladığı üçün nəzarət altına alınıb.

Oxu.Az xarici KİV-ə istinadla xəbər verir ki, “Oh My God” adlı ekran işində Malayziyadakı məscid, kilsə və buddist məbədinin içində din və mədəniyyətləri işarələyən paltarlar geyinmiş insanlarla rəqs edən ifaçının səsləndirdiyi mahnıda “Allah” kəlməsinin yer alması, eyni zamanda, bəstədə azan səsinin eşidildiyi üçün polis bu addımı atıb.

“İslamiyyəti və müqəddəs yerləri alçaltmaq” günahından Kuala Lumpur Beynəlxalq hava limanında saxlanılan 33 yaşlı müğənni Penanga aparılıb.

Adı açıqlanmayan bəzi qeyri-hökumət təşkilatlarından klipdə islam dininin əleyhinə dair görüntülərin olduğuna görə ifaçıdan polisə şikayət olunub.