Azərbaycanı Avropa İnsan Haqları Məhkəməsində təmsil edəcək hakimin hələ də kimliyinə aydınlıq gətirilməyib. Ötən il oktyabrın 31-dən etibarən səlahiyyət müddəti bitən hazırkı hakim Xanlar Hacıyevin yerinə Azərbaycan iki dəfə hakim təyin etməyə səy göstərsə də nəticəsiz qalıb. 

Azərbaycan hökuməti birinci dəfə 2015-ci ilin aprelində Avropa Məhkəməsinin hakimi vəzifəsinə üç namizəd irəli sürüb. Namizədlər Prezident Administrasiyasının Hüquq- mühafizə orqanları ilə iş şöbəsinin İnsan hüquqlarının müdafiəsi məsələləri sektorunun müdiri, Azərbaycanın Avropa Məhkəməsindəki daimi nümayəndəsi Çingiz Əsgərov, Bakı Apelyasiya Məhkəməsinin hakimi Aygün Abdullayeva və 1 saylı Bakı İnzibati-İqtisadi Məhkəməsinin hakimi Vüsalə Baxışova olub. Amma AŞ PA-nın Alt Komitəsi namizədləri qəbul etməyib və siyahını geri qaytarıb.

Azərbaycan ikinci dəfə bu ilin yanvarında hakimliyə namizədlərin siyahısını AŞ PA-ya təqdim edib. Bu vəzifəyə Prezident Administrasiyasının Hüquq-mühafizə orqanları ilə iş şöbəsinin sektor müdiri, Azərbaycanın İnsan Hüquqları üzrə Avropa Məhkəməsində daimi nümayəndəsi Çingiz Əsgərovun, Bakı Apelyasiya Məhkəməsinin hakimləri Sənan Hacıyevin və Elşanə Vəliyevanın namizədliyi irəli sürülmüşdü. Lakin AŞ PA-nın Alt Komitəsi ikinci dəfə də siyahını geri qaytarıb. 

Bu səbəbdən Azərbaycanı Avropa Məhkəməsində təmsil edən hakim Xanlar Hacıyevin səlahiyyət müddəti müvəqqəti artırılıb.

Azərbaycanda bəzi tanınmış hüquq müdafiəçiləri sözügedən vəzifədə görmək istədikləri adamların adını çəkərkən keçmiş baş prokuror, hazırda Azərbaycanın Serbiya, Monteneqro və Bosniya-Herseqovinada səfiri Eldar Həsənovun adını Avropa Məhkəməsində Azərbaycanı təmsil edəcək hakim kimi ən yaxşı kadr kimi qeyd ediblər. Bu fikirdə olanlar hesab edir ki, Eldar Həsənov kimi peşəkar kadr bu vəzifədə olarsa, Avropa Məhkəməsi ilə Azərbaycanın münasibətləri daha da yaxşılaşar.

Mayın 18-də səfir Eldar Həsənovla əlaqə saxladıq və Avropa Məhkəməsində Azərbaycanı təmsil edəcək hakim vəzifəsinə onun təklif edilməsinə münasibətini öyrəndik.

Eldar Həsənov “Yeni Müsavat”a açıqlamasında öncə onu dəyərləndirən insanlara təşəkkürünü bildirdi. Sonra qeyd etdi ki, Avropa Məhkəməsində Azərbaycanı təmsil edəcək hakimin kifayət qədər savadlı, təcrübəsi olan bir hüquqşünasın olması, əlbəttə, çox önəmlidir: “Məhkəmə-hüquq təcrübəsi ilə yanaşı, Avropa meyarlarını, beynəlxalq hüququ dərindən bilən, insan haqlarının inkişafına önəm verən, qanunun tətbiqində təcrübəsi olan bir hüquqşünasdan söhbət getməlidir. Düşünürəm ki, belə hüquqşünaslar ölkəmizdə yetərincə var. Dövlətimizin də seçimində bu amilləri nəzərə alacağına əminəm. Düşünürəm ki, dövlətimiz məhz belə bir kadrı oraya göndərəcək. O kadr ki, məhkəmə hüquq sistemində Xanlar Hacıyev səviyyəsində ola biləcək birisi olsun. Xanlar Hacıyev çox dərin biliyə, obyektiv ədalətli qanunun tətbiqinə əsaslanan lazımlı kadrdır. O ki qaldı mənə, mənim üçün sevindirici odur ki, mən 2001-ci ildən çalışdığım peşəyə o qədər bağlanmışam ki, başqa bir sahəyə getmək mənim üçün maraqlı və vacib deyil. Hazırda işlədiyim sahə mənim üçün çox maraqlıdır”. /Musavat.com/