Elxan Mehdiyev

Dövlət başçısı İlham Əliyevin sərəncamı ilə 2018-ci il Cümhuriyyət İli elan edilibdir. Bu sərəncamla bağlı müxtəlif tədbirlər planları həyata keçirilsə də, təəssüf ki, Cümhuriyyətimizin banisi olan Məhəmmədəmin Rəsulzadənin adını götürüldüyü Bakı Dövlət Universitetinə qaytarılmayıb. Rəsulzadənin qurduğu Cümhuriyyətin 100 illiyi qeyd edilsə də, Cümhuriyyətin banisinə qarşı düşmənçilik siyasəti davam etdirilir.

Məhəmmədəmin Rəsulzadənin və silahdaşlarının ən böyük arzuları Demokratik Azərbaycan Cümhuriyyətini quraraq, Azərbaycan xalqını dünyanın mədəni xalqları sırasının önünə çıxartmaq olmuşdur.

Bu gün Azərbaycanın dünyada yeri necə görsənir? Cümhuriyyətin prinsiplərinə əməl olunurmu?

1993-cü ildən bu günə qədər Azərbaycanda bir dənə də olsun demokratik seçkilər keçirilməyib, mətbuat və vicdan azadlığı boğulur, insanlar ifadə etdikləri fikirlərinə görə təqib edilir və ya həbs olunur, həbsxanalar siyasi məhbuslarla dolubdur. Belə olan halda Cümhuriyyət İlini keçirməyin nə mənası var ki?

İilham Əliyev və hakim komanda bir şeyi nəzərə almalıdırlar ki, tarix heçkimi və heçnəyi unutmur. Hər bir dövlət adamı xatırlanacaq, bəziləri sevgi ilə bəzilər isə nifrətlə ...!

Cümhuriyyətin prinsiplərini ayaq altına salıb tapdayaraq, “Cümhuriyyət İli” adlı sərəncam vermək, Cümhuriyyət maketini düzəldib, həqiqət kimi dünyaya sırımaqdır.

İlham Əliyev və hakimi komanda anlamalıdırlar ki, Azərbaycan xalqı mədəni və sivil bir xalqdır. Bu xalq 1918-ci ildə şərqin ilk cümhuriyyətini quraraq, insan haqlarının və qadın hüquqlarının qorunması baxımından dünyanın liderliyini edən bir xalqdır.  Müstəqillim uğrunda gedən savaşda dünyada “İlin Xalqı” adlanan Azərbaycan xalqını və Azərbaycan dövlətini bu gün dünyanın ən arzuedilməz siyahılarına saldırmaq xalqa və dövlətə qarşı edilən ən böyük tarixi cinayətdir ki, bunu da zaman qiymətlədirərək, tarix qiymətini verəcək. Azərbaycan xalqı gec ya tez yenə də özünə normal bir dövlət quracaqdır, çünki ocağı söndürsələr də közü sönməyib!