Ötən həftənin Cümə günü 39 dollara yüksələn Brent neftinin barrelinin qiyməti, həftənin ilk iş günündə 41,04 dollara qədər qalxandan sonra 40,30 dollar səviyyəsinə düşdü. Brent nefti sonuncu dəfə ötən ilin dekabr ayında 40 dollara satılmışdı.

Qiymətərin yüksəlməsinin əsas səbəblərindən biri ABŞ-da qazılan neft quyularının sayının azalmasıdır.
İkinci bir səbəb isə dünyanın iri neft istehsalçılarının görüşə hazırlaşmalarıdır. Rusiyanın energetika naziri Aleksandr Novakın dövlət televiziyasına verdiyi açıqlamaya görə, 20 Mart ilə 1 Aprel arasında bir dövrdə böyük istehsalçılar arasında istehsalın dondurulmasına dair görüş keçiriləcək. Görüş Rusiya, Doha və ya Vyanada həyata keçirilə bilər.
İnvestorlar və treyderlər neftdə yaxınlaşmaqda olan “ralli” gözləyirlər. OPEC və OPEC-ə daxil olmayan ölkələrin neft hasilatını “dondurmaqda” razılaşacaqlarına dair iddialar neftin qiymətinin artmasına təkan verir.
Nigeriyanın Neft mənbələri üzrə dövlət naziri Emmanuel Ibe Kachikwu, istehsalçıların ümumi olaraq xam neft qiymətlərinin 50 dollar səviyyəsinə gəlməsini istədiyini bildirmişdir. /”Marja”