Yasamal polisi paytaxtın müxtəlif yerlərində ayrı-ayrı vətəndaşlara qarşı quldurluq etmiş dəstəni saxlayıb.

APA-nın məlumatına görə, Yasamal Rayon Polis İdarəsinin 28-ci Polis Bölməsinin əməkdaşlarının keçirdikləri əməliyyat zamanı dəstə üzvləri Xikmət İsgəndərov, Qafar Bağırbəyov, Rauf Əlimuxtarov və İbadulla Əlimuxatrov qardaşları saxlanılıblar. İlkin dindirilmə zamanı məlum olub ki,  dəstənin başçısı əvvəllər  məhkum olunmuş, Yasamal rayon sakini 18 yaşlı Xikmət Fikrət oğlu İsgəndərov Bədəlov Əli Mahmud oğluna və Süleymanov Fuad Əli oğluna qarşı bıçaqla hədələməklə soyğunçuluq edib.

Dəstə üzvləri dindirilmə zamanı Yasamal rayonu, Şərifzadə küçəsində avtobus sürücüsü və köməkçisini döyərək ağır bədən xəsarətlərini yetirdiklərini də etiraf ediblər. Bundan başqa onlar Orucov Şamxal İbrahim oğlundan ona məxsus mobil telefonu dələduzluq edərək götürüblər.

Saxlanılan Xikmət İsgəndərovun telefonuna baxış keçirilərkən  onun cinayət əməllərini mobil telefonuna çəkdiyi də məlum olub.

Quldur dəstənin əməllərindən zərər çəkənlərdən Yasamal Rayon Polis İdarəsinin  28-ci Polis Bölməsinə müraciət etmələri xahiş olunur.