“Gənc Demokratlar Hərəkatı”nın sədri Emin Bəşirli ilə yeni təşkilatın hədəfləri barəsində söhbət apardıq

-Emin bəy, Azərbaycanda Qeyri-Hökumət Təşkilatlarının çətin vəziyyətdə olduğu vaxtda yeni hərəkatın yaranmağını nə dərəcədə zəruri hesab edirsiniz?

- Əslində təşkilat xeyli müddətdir yaranıb və ətrafımızda xeyli aktiv gənclər vardır. Mənə elə gəlir ki, hər hansı fəaliyyətlə məşğul olmaq mövcud situasiyayla deyil, qanuncvericiliyə uyğun olmaqla müəyyənləşə bilər. Bu mənada İctimai Birlik təsis etmək bizim konstirusion hüququmuzdur. Eyni zamanda biz demokratik toplum yaratmaqla bu prosesə qarşı çıxanlara mübarizliyimizi göstərərək demokratik prinsipləri təbliğ etmək niyyətindəyik.

- Sizcə, demokratik prinsiplərin təbliğinə nə dərəcədə ehtiyac var, yəni bu çatışmazlığı nədə görürsünüz?

- Azərbaycanda demokratik və azad seçkilərin olmaması, müstəqil mətbuatın olduqca zəif olması, televiziyaların hakimiyyətin əlində alət olması, Qeyri-Hökumət Təşkilatlarının sıradan çıxarılması, dini tolerantlığın olmaması, fikir müxtəlifliyinə qarşı hakimiyyətin dözümsüzlüyü, 100-ə yaxın siyasi məhbusun olması məncə olkədəki ictimai-siyasi vəziyyəti analiz etməyə imkan verir. Deməli, ölkədə alternativ fikir yoxdur və insan hüquqları kobud şəkildə pozulur. Bunu İntiqam Əliyevin, Rəsul Cəfərovun, Taleh Bağırzadənin, Taleh Xasməmmədovun, Xədicə İsmayılovanın və s. həbsdə olması ilə göstərmək olar. Eyni zamanda 1993-cü ildən başlayaraq Azərbaycanda azad və ədalətli seçkilər keçirilmir. Buna görə də gənc demokratların azad söz, azad vətəndaş cəmiyyəti, alternativ fikir fonunda formalaşmasına ciddi ehtiyac vardır.

- Emin bəy, fikirləriniz kifayət qədər hakimiyyətə qarşı sərtdir, bu durumda qeydiyyata alınacağınıza nə kimi ümid edirsiniz?

-Fikirlərim radikal deyil, sadəcə həqiqətdir. Əgər Ədliyyə Nazirliyi həqiqəti dediyimizə görə qeydiyyata almayacaqsa, biz başqa cür mübarizə aparacağıq. Biz onsuz da Azərbaycanın vəziyyəti barəsində gənclərə və ictimaiyyətə məlumatlar çatdırırıq. Azad iqtisadiyyatın, azad siyasi fəaliyyətin, azad sahibkarlığın, azad dini fəaliyyətin, azad həmkarlar ittifaqlarının, azad jurnalistikanın olması və bu istiqamətdə mübarizə aparmaq bu günkü gənclərin əsas hədəfi olmalıdır. Gənc Demokratlar hərəkatı bu ideyaları təbliğ edəcək və ölkədə reallaşması istiqamətində fəaliyyətlər həyata keçirəcəkdir. Siz də bizim fikirlərimizə yer verdiyinizə görə təşəkkürümüzü çatdırırıq.