İran İnqilabı keşikçiləri korpusunun generalı Abdurrza Muciri Suriyanın Hələb şəhərində öldürülüb. ANS PRESS-in məlumatına görə, bu barədə yerli “sahebnews” saytı xəbər yayıb. 123-cü taborun komandiri olan 53 yaşlı general Hələbdə baş verən insident zamanı öldürülüb. İranlı general suriyalı müxaliflər və İŞİD terrorçularına qarşı Bəşər Əsəd rejiminə yardım etmək üçün bu ölkəyə gedibmiş.

Suriyada 2011-ci ildən bəri davam edən vətəndaş müharibəsində rəsmi Tehran Bəşər Əsəd rejiminə canlı qüvvə ilə dəstək verir. Təxmini rəqəmlərə görə, indiyə qədər Suriyada İran İnqiabı Keşikçiləri korpusunun 8 general və onlarla rütbəli zabit olmaqla 400-dən çox hərbçisi ölüb.

Oktyabrın 1-dən bu günə qədər isə 3 general olmaqla ölən iranlı hərbçi sayı 54 olub.

İran İnqilabı Keşikçiləri korpusunun ictimaiyyətlə əlaqələr departamentinin rəhbəri briqadir generalı Ramazan Şərif oktyabrın 23-də “Fars” agentliyinə verdiyi müsahibədə Suriyaya göndərilən əsgər sayını artıracaqlarını demişdi.