Oqtay Gülalıyev; “O insanlarla bir təşkilatda olmaqdan qürur duydum”

Qarşıdan gələn parlament seçkilərində iştirak etmək üçün Klassik Xalq Cəbhəsi Partiyasının (KXCP) qeydiyyata alınan və alınmayan deputatlığa namizəd üzvlərinin iştirakı ilə partiya qərargahında müşavirə keçirildi. Müşavirənin keçirilməsinə səbəb seçki prosesinə qatılan şəxslərin iştirakı ilə həm seçkilərlə bağlı mövcud durumu, həm də 01 noyabr parlament seçkilərində KXCP- nin iştirakdan imtina etməsi barədə bir sıra partiya üzvləri və rəhbərlikdə təmsil olunan şəxslərin irəli sürdüyü təklifi müzakirə etmək idi.

Müşavirədə seçki prosesinə qatılan şəxslər imza toplama və təbliğat- təşviqat mərhələsində qarşılaşdıqları çox saylı qanun pozuntularından, hakimiyyətin seçkiyə kobud müdaxiləsindən danışdılar. Çıxışçılar bildirdilər ki, hakimiyyət Azərbaycanda normal seçki keçirmək istəyində və qabiliyyətində deyil, qarşıdan gələn seçkilər də seçki deyil, növbəti imitasiya, təyinatdır. Məhz bu səbəbdən də xalq seçkilərdə iştirakdan imtina edir. Toplantıda çıxış edən deputatlığa namizədliyi qeydiyyata alınmış partiya üzvlərinin böyük əksəriyyəti seçkilərin nəticələrinin saxtalaşdırılacağına heç bir şübhənin olmadığı, nəticələri bəri başdan bəlli olan seçkilərdə bu vəziyyətdə və şərtlər altında partiyanın iştirakının yol verilməz olduğunu bildirərək seçki şousundan imtina edilməsi təklifi ilə çıxış etdilər. Partiyadaşlarımın seçkilərlə bağlı vəziyyəti çox düzgün və obyektiv qiymətləndirərək gəldikləri qənaət çox yerindəydi. Mən onları dinləyərkən Əbülfəz Elçibəyin AXC ilə bağlı dediyi məşhur bir söz yadıma düşdü; “Xalq Cəbhəsi haqqın və xalqın cəbhəsidir”. Mən bir daha əmin oldum ki, cəhbəçi dostlarım haqqın və xalqın yanındadırlar. O insanlarla bir təşkilatda olmaqdan qürur duydum. Əslində bu mövqe son zamanlar KXCP ilə bağlı cəmiyyətdə müzakirələrə yol açmış bəzi anlaşımazlıqlara, suallara verilən ən gözəl cavabdır. Hər bir təşkilatın fərqli mübarizə taktikası ola bilər. Önəmlisi təşkilatın və həmin təşkilatda cəmləşən insanların getdikləri yola sadiq olmalarıdır. KXCP yoluna, mübarizəsinə, Elçibəy ideyalarına sadiq təşkilatdır. Mən buna bir daha əmin oldum. Hər kəs də əmin olsun!