Aydın Mirzəzadə: “Seçki məsələsini dəyirmi masada müzakirə etmək Konstitusiyaya ziddir” 

Yeni Azərbaycan Partiyası Siyasi Şurasının üzvü, millət vəkili Aydın Mirzəzadə “AĞ blok”un dəyirmi masa keçirmək üçün Azərbaycan hakimiyyətinə müraciətinə cavab verib. 

Xatırladaq ki, “AĞ blok” hakimiyyəti 2015-ci il parlament seçkiləri öncəsi ölkədə  bütün siyasi maraqlı tərəfləri əhatə edəcək dəyirmi masa təşkil etməyə çağırıb. Bu dəyirmi masada "seçkilər", "Seçki Məcəlləsi", "say komissiyaları və onların tərkibi" və s. aktual problemli məsələlər müzakirəyə çıxarılmasının vacibliyi qeyd edilir. “Ümumi və geniş konsensus əldə olunması və seçkilərin legitimlik məsələsinin həlli də, bu dəyirmi masadan xeyli dərəcədə asılı ola bilər. Bu tədbir mətbuat və ictimaiyyət üçün tam açıq və şəffaf şəkildə təşkil olunmalıdır. Əsas məqsədlərdən biri milli etimad mühitinin yaradılması və xalqla siyasi sistemin qarşılıqlı etimadının təmin olunması olmalıdır”-deyə müraciətdə bildirilir. Aydın Mirzəzadə isə Cebhe.info-ya açıqlamasında deyib ki, dəyirmi masa seçki məsələsinin müzakirəsi mövzusu ola bilməz: “Dəyirmi masa fikir mübadiləsi məkanıdır və hakimiyyətin səlahiyyətlərini həyata keçirmir. Seçki qanunveriviliyinə dair müzakirələr və qərarlar parlamentdə qəbul olunur. Seçkidə iştirak etmək istəyən bütün tərəflər, partiyalar, bloklar və namizədlər öz təkliflərini seçki kampaniyası çərçivəsində seçicilərə çatdıra bilər. Ona görə hesab edirəm ki, seçki qanunvericiliyinə aid olan məsələlərin dəyirmi masada müzakirəyə çıxarılması Azərbaycan Konstitusiyasına ziddir”. Millət vəkili onu da bildirib ki, Azərbaycan hakimiyyəti seçkidə iştirak edib-etməməsindən asılı olmayaraq bütün siyasi qüvvələrlə dialoqu davam etdirməyə hazırdır. Lakin dialoq və ya dəyirmi masa siyasi qərarların qəbul olunduğu yer deyil: “Orada müxtəlif təkliflər səslənə bilər, dialoqda iştirak edən tərəflər öz mövqeyini ortaya qoya bilər. Ancaq seçki qanunvericiliyinin dəyişdirilməsini nəzərdə tutan təkliflər Konstitusiyaya zidd olduğundan buna ehtiyac yoxdur”.(Musavat.com)