Qarabağ Azadlıq Təşkilatının üzvləri Ağdam rayonunun işğal günü ilə bağlı Bakıda Şəhidlər Xiyabanını ziyarət etdilər, bütün Qarabağ döyüşçülərinin məzarları, “Əbədi Məşəl” abidəsi, Türk Şəhidliyi, general Həzi Aslanovun abidəsi ziyarət olundu, ruhlarına dualar oxundu, güllər qoyuldu. QAT sədri Akif Nağı ziyarətin sonunda bildirdi: “Hadisələrin gedişi göstərir ki, torpaqlarımızı yalnız hərbi yolla azad edə bilərik. Ağdamın işğalı cəbhədə böyük uğursuzluqlarımızın başlanğıcını qoydu. Uğurlarımız da Ağdamın işğaldan azad olunması ilə başlayacaq, Şuşanın, Xankəndinin azad olunması ilə yekunlaşacaq.”

Ziyarətdən sonra bir qrup QAT üzvü Şəhidlər Xiyabanından Bakı Şəhər İcra hakimiyyətinə qədər yürüş etdi. Yürüşdə məqsəd Şəhidlər Xiyabanındakı bir sıra problemləri şəhər hakimiyyətinin diqqətinə çatdırmaq idi. Bakı şəhər İcra hakimiyyətinin aparat rəhbəri Rasim Quliyev, sonra isə icra başçısı Hacıbala Abutalıbov QAT üzvülərindən Akif Nağı, Nəsib Cəfərov, Qələndər İsmayılov, Solmaz Alıyeva, Mahirə Muradova, Məmmədəli Quliyev, Nazim Tapdıqoğlunun daxil olduğu nümayəndə heyətini qəbul ediblər. QAT nümayəndələri Şəhidlər Xiyabanındakı aşağıdakı problemləri diqqətə çatdırdı:

1.      Qarabağ müharibəsi şəhidlərinin məzarlarının ağaclar arxasında gizlədilməsi, onların görünməməsi.

2.      Bəzi şəhid məzarlarının pis vəziyyətdə olması, baş daşlarının əyilməsi, yazıların oxunmaz hala düşməsi, sinə daşlarının çatlaması.

3.      Məzarların ətrafında abadlıq işlərinin aparılmasına ehtiyac olması.

4.      Şəhidlər Xiyabanına gedən avtobus marşrutlarının olmaması.

5.      Şəhərdə Qarabağla bağlı lövhələrin, plakatların, videoçarxların olmaması.

Bakı şəhər İcra hakimiyyətinin başçısı Hacıbala Abutalıbov deyilən problemlərin böyük əksəriyyəti ilə bağlı dərhal tapşırıqlarını verdi, tapşırıqların içrası üçün avqustun 15- nə qədər vaxt müəyyənləşdirdi. Yalnız bir məsələ açıq qaldı. Şəhid məzarlarının qarşısını kəsən ağacların götürülməsi ilə bağlı razılıq əldə olunmadı. Hacıbala Abutalıbov bu məsələləri qaldırdıqlarına görə QAT üzvlərinə təşəkkür etdi, ağaclarla bağlı məsələnin çətin məsələ olduğunu, amma bu barədə də düşünəcəyini bildirdi.