“23 ildir ki, Xəzər rayonu, Mərdəkan qəsəbəsi, Günəşli sanatoriyasında məskunlaşmışıq. Oğlanlarımı evləndirdiyim üçün Günəşli sanatoriyasının həyətində ev tikdim. Evi tikib qurtardığım gün isə gəlib bildirdilər ki, ev sökülməlidir. Bunu tikəndə əvvəldən görürdünüz, niyə demirdiniz ki, qanunsuzdur, tikmək olmaz?! Mən o evi tikmək üçün borca girmişdim”.

Bu sözləri Xocalı sakini, 2-ci qrup Qarabağ əlili Oqtay Abdullayev Musavat.com-un redaksiyasına müraciət edərək deyib. Şikayətçi ev tikmək üçün 50 min manatdan çox xərc çəkdiyini dedi: “Biz Xocalıdan çıxanda ailə üzvlərimin sayı 5 nəfər idi. Övladlarım ailə qurduqdan sonra ailə üzvlərimizin sayı artaraq 13 nəfər olub. Məcbur olub 2014-cü ilin mart ayında Günəşli sanatoriyasının boş ərazisində icazəsiz olaraq ev tikdim.

Mən evi tikdiyim ərazi zibilxana kimi bir yer idi. Oğlum 3 il idi ki, nişanlı idi. Ev problemi ucbatından evləndirə bilmirdim. Evi tikib qurtarana qədər bir nəfər də olsa gəlib demədi ki, niyə tikirsən və ya olmaz. Amma evi tam tikib qurtardığım gün sanatoriyanın baş həkiminin köməkçisi gəlib evin şəklini çəkərək məni Xəzər Rayon Məhkəməsinə verdi ki, bu ev sökülməlidir. Mənim tikdiyim evin sanatoriyaya heç bir maneçiliyi yoxdur. Artıq bir ildir ki, məhkəmələrdə qalmışam. Məhkəmələrdə qərar çıxarır ki, ev sökülməlidir. Hazırda iş Ali Məhkəmədədir. Mən də bilirəm ki, evi icazəsiz tikmişəm. 

Ancaq nə edə bilərdim, çarəsiz idim. Mən o evi tikəndə hər kəs görürdü. O zaman niyə yaxınlaşıb demədilər ki, xərc çəkib tikmə, onsuz da söküləcək?! Mən banka, borca girərək o evin tikilməsinə 50 min manatdan çox vəsait sərf etmişəm. Hazırda da onun borclarını ödəyirəm. Prezidentə, aidiyyəti qurumlara məktub yazaraq xahiş etmişəm ki, torpaqlarımız geri alınana qədər mənə o evdə müvəqqəti yaşamağa icazə versinlər. Ya da məni başqa evlə təmin etsinlər. Əgər bunların heç biri mümkün deyilsə, mənim o evin tikilməsinə sərf etdiyim vəsait qaytarılsın. Ancaq müraciətlərimə hələ ki cavab gəlməyib. Qəzetiniz vasitəsilə dövlət başçısından və aidiyyəti qurumlardan bir daha xahiş edirəm ki, məhkəmə dayandırılsın, evi sökməsinlər. İcazə versinlər torpaqlarımız qayıdana qədər həmin evdə yaşayaq”./Musavat.com/