Türkiyənin baş naziri Əhməd Davudoğlu separatçı kürdlərin siyasi lideri Səlahəddin Demirtaşı ermənilərə dəstək verməkdə ittiham edib. ANS PRESS-in məlumatına görə, ötən axşam İzmirdə səfərdə olan baş nazir burda “Show Tv”də iştirak etdiyi proqramda aparıcının bu istiqamətdə verdiyi sualları cavablayıb. 

Qondarma “soyqırımı” iddiaları ilə əlaqədar bütün dünyanın Türkiyə əleyhində kampaniya apardığını deyən Davudoğlu HDP həmsədri Demirtaşın da Türkiyə əleyhinə ifadələr səsləndirdiyini, kürdlər adına üzr istədiyini vurğulayıb. 

“Sizin atalarınızı bu istiqamətdə ittiham edən bir nəfər sizin nümayəndəniz ola bilərmi? Əgər kürdlər və türklər bunu etdilər kimi bir söz işlədirsə onun türkiyəlişməsi mümkündürmü? Qondarma erməni “soyqırımı” iddialarını gündəmə gətirən Kandil, İmralı, HDP üçbucağında elə ünsürlər var ki, onlar, bu torpaqlarda bəzi əməliyyatlar həyata keçirmək istəyənlərin sözçüləridir”. 

Baş nazir həmçinin Səlahəddin Demirtaşın xarici səfərlərində erməni diasporu ilə görüşərək sövdələşdiyini bildirib və bunu kürdlərə açıqlamalı olduğunu deyib:

“Hansı sövdələşmələri etdi ki, qayıdanda “sülh prosesi”nə qarşı sabotaja əl atdı. Hansı sövdələşmələri etdi ki, “sülh prosesi”nin işlədiyi coğrafiya üzərində haq iddia edən ermənilərlə birgə hərəkət edir. Bu sualın cavabını versək gələcəkdə “sülh prosesi”nin irəliləyişi məsələsində düzgün bir yerdə olacağıq”.