Hüquq müdafiəçisi Vidadi İsgəndərli aclıq aksiyasına başlayıb. 

O, Göyçay prokuroru Muxtar Eminovun hərəkətsizliyinə etiraz olaraq aksiyaya əl atdığını bildirib. 

V.İsgəndərli “Yeni Müsavat”a deyib ki, korrupsiyaya bulaşmış Çingiz Səlimov haqda yolladığı şikayətlər araşdırılmaq üçün Göyçay Rayon Prokurorluğuna göndərilib: “Prokuror tədbir görmək əvəzinə, bu şəxsin himayədarı rolunda çıxış edir, məni həbslə hədələyir. Ona görə də martın 7-dən fasiləsiz aclıq aksiyasına başlamışam. Səhhətim imkan verməsə də, aksiyanı davam etdirəcəyəm. Tələb edirəm ki, Çingiz Səlimovla bağlı operativ və ədalətli araşdırma aparılsın. Əgər rayon prokurorunun bu özbaşınalıqlarına son qoyulmasa, mən ailəmlə birlikdə ABŞ səfirliyindən siyasi sığınacaq istəyəcəyəm”. 

Hüquq müdafiəçidi deyib ki, özü ilə bərabər hüququnu müdafiə etdiyi şəxs də hədələrə məruz qalır: “Əks tərəfdəki mafioz qrupların təhdid və təzyiqlərinə məruz qaldıq. Bu yaxınlarda müdafiə etdiyim Ağalar Səlimovun işi ilə bağlı rayon prokurorluğuna sorğu göndərdim. Həmin sorğuda müdafiə etdiyim şəxsin şəriki olan Çingiz Səlimov tərəfindən hüquqlarının pozulduğunu və bu barədə rayon prokurorluğundan bu işin mahiyyətini araşdırmaq üçün cinayət işinin başlanmasını tələb etsəm də, prokuror Muxtar Eminov, Çingiz Səlimov haqda tədbir görmək əvəzinə bu şəxsin himayədarı rolunda məni həbslə hədələdi”. 

V.İsgəndərli Göyçay, Ucar və digər regionlarda vətəndaşların hüquqlarını müdafiə etməklə yanaşı, bu sahədə yaranmış neqativ hallarla bağlı, mütəmadi olaraq ölkə rəhbərliyinə, mətbuata məlumatlar verir. Hüquq müdafiəçisi kimi fəaliyyətinə görə əvvəllər həbs olunub, beynəlxalq təşkilatlar tərəfindən “vicdan məhbusu” kimi tanınıb.