Qazax rayon torpaq və xəritəçəkmə şöbəsinin müdiri Sərxan Nəbiyev bələdiyyə sədrləri ilə birləşərək torpaqları qanunsuz olaraq vətəndaşlara satır.

Bələdiyyə sədri yaxın qohumu Sərxan Nəbiyevlə Şəhidlər Xiyabanının ərazisin satışa çıxarıb.

Əgər hansı təşkilatsa bələdiyyə orqanlarında baş vermiş nöqsanlarla bağlı araşdırma aparmaq istəsə, əziyyət çəkib bir neçə bələdiyyənin araşdırılmasına qatılaşmasın. Çox düşünməyə dəyməz. Bu Qazax rayonunun ən böyük kəndi olan Daş Salahlı bələdiyyəsidir.

Bələdiyyənin fəaliyyətinə nəzər salsaq bu barədə bütün saxtakarlığın ən baris nümunəsini görə bilərik. Bu bələdiyyənin səlahiyyətlərinə aid nümunə götürsək bir yaxşı iş tapmasaq da özbaşınalıq, saxtakarlıq və xeyli pis əməllərə rast gəldik. Biz Daş Salahlı kəndinə şikayətçi şəhid anası Cəbiyeva Sürəyya ananın xahişi ilə gəlmişdik. Gəlişimiz heç də ürəkaçan olmadı. Gördüyümüz mənzərə bizi dəhşətə gətirdi. Kəndə girəcəkdə bizi “Şəhidlər xiyabanı” yazılmış lövhənin yanında qarşıladılar. Yerə yıxılmış qapıdan içəri keçdik. Xiyabanın içərisində otlayan iribuynuzlu mal-qaranı görəndə dərhal faktları sübut etmək üçün şəkil də çəkdik. 

Şikayətçi, şəhid anası Sürəyya ananın şikayəti əsaslı idi. Xiyabanda tikilmiş türbənin içərisində “Şəhidlər unudulmur” sözləri yazılmış mərmər daş sınmış halda zibillərin əhatəsində az qala görünmürdü. Bələdiyyə sədri Mahir Quliyevin maraqlarına cavab verən xiyaban 2 ha sahədən ibarətdir. 2 ha sahə hasara alınsa da, hasarın içərisində yeni hasar da tikilmişdir. Belə ki, baş daşları yenidən hasara alınıb. Şikayətçidən soruşanda ki, bu niyə belədir? Sürəyya ana bunu bələdiyyə sədri Mahir Quliyevin xiyabanın ərazisini satmaq fikirində olduğunu bildirdi.

Elə bu sözlərə sübut kimi ərazidə bir neçə tikilini də gördük. 

Keçmiş bələdiyyə sədri tərəfindən 2000-ci ildə təmir edilmiş və bir giriş qapısı qoyulmasına baxmayaraq iribuynuzlu heyvanların otlaq sahəsinə çevrilməsi bir başa bələdiyyə sədri Mahir Quliyevin maraqlarını güdür. Belə olmasaydı sədr bu mənzərəyə və şəhidlərimizə sayğısızlıq etməzdi...
Bələdiyyə sədrini görə bilməsək də, telefonla əlaqə yaratdıq. 

O, özünün səlahiyyətlərinin nədən ibarət olduğunu sübut etdi. Uşaq başı aldadan kimi bizə lazımi ünvana zəng vurmağımızı bildirdi. Şəhidlər xiyabanına nəzarəti kənd inzibati ərazi nümayəndəsi etdiyini bildirdi. Nə deyək? Yəqin Mahir müəllim öz səlahiyyətlərinin ancaq torpaq alqı-satqısından ibarət olduğunu bilir. Biz isə Sürəyya anaya Allahdan səbr diləyib ayrıldıq.

Mövzu ilə bağlı araşdırmalarımız davam edir.

Qarşı tərəfində fikirlərinə yer ayırmağa hazırıq!

Ələddin Kəsəmənli