Firudin Qurbansoy: “Bu, bizə dost olmayan hərbçilərin planı idi”

Martın 27-də saat 12 radələrində Bakının Səbayel və Yasamal rayonları ərazisində müəmmalı gurultu eşidilib. Həmin səs o qədər güclü olub ki, hətta binaları da titrədib. Həmin səslə paralel Badamdar qəsəbəsi ərazisində hiss edilən səs və binaların titrəməsi insanlar arasında təlaşa səbəb olub. Kimiləri bunun haradasa vulkan baş verməsi nəticəsində olduğunu düşünür, kimisi isə mistika ilə əlaqələndirir və qiyamət gününün yaxınlaşmasını xəbər edən bir səs olduğunu deyir.

Bəs əslində səbəb nədir?

Azərbaycan Milli Elmlər Akademiyasının (AMEA) Respublika Seysmoloji Xidmət Mərkəzinin baş direktoru Qurban Yetirmişli bunun zəlzələ olmadığını deyib: “Bizim üçün də bu gurultunun nə olduğu maraqlıdır. Nədirsə, axtarıb tapmaq lazımdır. Amma bunu tapmaq bizim işimiz deyil. Biz yalnız ona deyə bilərik ki, bu gurultunun zəlzələ ilə heç bir əlaqəsi yoxdur”.

Astroloq Firudin Qurbansoy isə bunun bizi sevməyən bəzi dövlətlərin hərb işi olduğunu dedi: “Hər şeyi mistik yozmaq olar. Mənə elə gəlir ki, bu, sadəcə olaraq, bizə dost olmayan hərbçilərin planı idi. Onlar hansısa silah dalğası buraxıblar. Bakı və Abşeron elə bir yerdir ki, burada çoxlu köhnə neft mədənləri var. Ona görə də burada böyük zəlzələlər olmur, ola da bilməz. İndi iqlim silahları var. İstədikləri yerdə nə istəsən edə bilirlər. Mənə elə gəlir ki, bu bizə dost olmayan, son vaxtlar bizi sevməyən, bizə dişini qıcatmaq istəyən qüvvələrin hərbi əməliyyatıdır. Bunun astrologiya, planetlər və Günəşlə heç bir əlaqəsi yoxdur”.
Binaların silkələnməsinə səbəb olan yer təkindəki titrəmənin Qobuda baş verdiyini deyən Milli Elmlər Akademiyası (AMEA) Geologiya İnstitutunun Palçıq vulkanizmi şöbəsinin rəhbəri, professor Adil Əliyev isə “Trend”ə açıqlamasında bildirib ki, Qobudakı titrəmə vulkanların oyanmasına təsir göstərməyib və göstərəcəyi də gözlənilmir. “Həmin titrəmənin nə vulkan, nə də zəlzələ ilə heç bir əlaqəsi olub. Haradasa partlayış olubsa, o demək deyil ki, bu vulkandır, ya da zəlzələdir” - deyən professor Qobudakı titrəmənin səbəbi, mənbəyi barədə izahat verməyib.

Professor, geologiya-mineralogiya elmləri doktoru, Zəlzələlərin Proqnozlaşdırılması üzrə Qlobal Şəbəkənin (GNFE) prezidenti, azərbaycanlı alim Elçin Xəlilov isə izahedilməz səslərin Günəşdə baş verən kataklizmlərin nəticəsi olduğunu deyib. “Günəş enerjisi Yer kürəsinə axını zamanı maqnitosferlə toqquşur ki, bu da xüsusi akustik dalğalara çevrilir. Bundan sonra həmin dalğalar Yer səthinə yönəlir. Bu dalğaları xüsusi cihazlar vasitəsilə eşitmək olar. Lakin bu səslər aşağı tezliklə şəhər səs-küyünə uyğunlaşanda bəzi insanlar bunu eşidə bilərlər”, - E.Xəlilov bildirib.

Bu səsin bir çox şahidlərdə təlaşa səbəb olmasını E.Xəlilov aşağı tezlikdə olması ilə əlaqələndirib. Aşağı tezlikli səs insan qulağı ilə eşidilməsə də, insan psixikasına mənfi təsir göstərir. Bu, fransız professor Qavronun araşdırmalarında öz təsdiqini tapıb. Bununla yanaşı, alimin fikrincə, bu gurultunu hər hansı bir anomal hadisə ilə əlaqələndirmək tezdir.

Fiziklər isə bildirirlər ki, bu səslərin spektri heç vaxt məlum olmur. Eşidilən səslər əsl səsin yalnız kiçik hissəsidir. Bu səslər 20-100Hz arasındakı ultra-az tezliyindəki akustik emissiyaları və 0.1-15Hz arasında ultra-az infrasonik olan dalğalardır. Geofizikada bunlara akustik cazibə dalğaları deyilir. Atmosferin yuxarı qatlarında, xüsusilə ionosferdə olur. Bu dalğaların yaranmasının bir sıra səbəbləri var. Məsələn, zəlzələ, vulkan partlayışları, qasırğa, sunami və s. Lakin təbii fəlakətlərin yaratdığı səslər eşidilən naməlum gurultudan daha zəifdir. Fiziklərə görə, belə bir səs üçün yüksək enerji tələb olunur. Bu, həmçinin dünyaya çırpılan ionosfer, atmosferin yuxarı qatını və mezosferi qeyri-sabit vəziyyətə gətirən Günəş partlayışı və enerji axınları da ola bilər.

Bu müəmmalı gurultu ilə bağlı müəyyən versiyalar irəli sürülsə də, hələlik dəqiq səbəb bilinmir. Qeyd edək ki, DİN və Dövlət Təhlükəsizlik Xidmətindən də məsələ ilə bağlı münasibət bildirilməyib.

musavat.com