Türkiyənin təhlükəsizlik səbəbiylə Suriya sərhədinə 82 km uzunluğunda bir divar inşa edəcəyi bildirilir. 

  Avropa.info xəbər verir ki, Türkiyənin Suriyada İŞİD ilə olan 98 km-lik sərhədini bağlaması üçün ABŞ və Rusiyadan təzyiqlərin artdığı iddia edilir. 

 Məsələylə bağlı keçən günlərdə Ankarada ABŞ və Türkiyə rəsmiləri arasında maraqlı bir dialoqun baş verdiyi bildirilir. 

 Əldə olunan məlumata görə sərhədin bağlanması üçün ABŞ-ın irəli sürdüyü "sərhəd boyunca əsgər yığın" təklifinə Türkiyə tərəfi "sizin dediyiniz üsulla bağlaya bilməyimiz üçün hər 3 metrdən bir əsgər yerləşdirməyimiz lazımdır ki, bunun üçün də 30 min əsgər lazımdır" deyə cavab verib. 

 "Wall Street Journal" qəzetinin yaydığı məlumata görə isə ABŞ-ın bir dövlət rəsmisi məsələyə münasibət bildirərkən Türkiyənin Amerikanın təklifini iki şeyə görə qəbul etmədiyini söyləyib. 

 Bunlardan birincisi həmin təklifin həyata keçirilməsinin çətin olması, digəri isə qarşı tərəfin məsələyə sərt reaksiya göstərərək hücuma keçməsidir.