Rəsmi Brüssel Poroşenkonu qəbul etmək istəmir

 Almaniyanın “ Die Welt” qəzeti yazır ki, rəsmi Brüssel Ukrayna prezidenti Pyotr Poroşenko ilə görüşdən imtina edir. Bu imtina Avropa Birliyi (AB) ilə Ukrayna arasında Rusiyaya münasibətdə ciddi fərqlərin ortaya çıxdığı bir vaxta təsadüf edir. Narazılığın əsas səbəbi isə AB-nin Rusiyaya tətbiq etdiyi əlavə sanksiyalarla bağlıdır. Əlavə sanksiyalarda əsasən neft və qaz yataqlarının istismarında gərəkən avadanlıqların satışına qadağa qoyulur. Digər təbii resursların əldə edilməsi üçün gərəkən texnologiyaların Rusiyaya satışı da AB tərəfindən yasaqlanır.

 Ukrayna tərəfi hesab edir ki, bu sanksiyalar simvolik xapakter daşıyır. Bunun əvəzində AB daha ciddi sanksiyalara əl atmalıydı. Məsələn, Rusiyanı beynəlxalq ödəmə sistemi olan “SWIFT”dən kənara atmaq lazım idi. Ukraynanın AB-ki səfir Konstantin Yeliseyev deyib ki, AB-nin Rusiya ilə necə davranmaqla bağlı ciddi strategiyası yoxdur. Bütün çətinliklər isə bu nəhəng problemə söykənir.

 Ukrayna prezidenti isə cümə axşamı Brusseldə olmağı planlaşdırır. O, Avropa liderlərini Ukraynada baş verənlərlə şəxsən məlumatlandırmaq istəyir. Ancaq AB, jurnalistlərin dediyi kimi, “cənab Poroşenkonu qəbul etmək istəmir”.  AB-də səfir olan ölkələrin birinin nümayəndəsi deyib ki, hazırda Poroşenkonu qəbul etmək üçün elə bir əsas yoxdur. Poroşenko AB tərəfindən həmişə diqqət mərkəzində olub. Yəni, onun şikayətlənməyə elə bir əsası yoxdur. Hazırda isə Poroşenkonun Brüsselə gəlişi gərəksiz görünür.

 Siyasi analitiklər hesab edirlər ki, rəsmi Brüsselin belə bir mövqe sərgiləməsinin arxasında ciddi amil dayanır. Belə ki, AB Rusiya prezidenti Vladimir Putinlə danışıqlar aparır. Hədəf isə Ukrayna böhranına görə yaranmış gərginliyi aradan qaldırmaqdan ibarətdir. Həmin danışıqlarda Ukrayna ilə Rusiya və separatçılar arasında əldə olunmuş atəşkəsin davamlı olması da önə sürülüb. O da qeyd olunur ki, cənab Poroşenkonun Brüsselə səfəri Avropa liderləri arasında bu məsələyə olan münasibətdə mövcud olan ziddiyyətləri daha da dərinləşdirə bilər.

  Hələ ki, Kiyev və Brüssel bir-birini kuluarlarda ittiham edir. AB nümayəndələri deyirlər ki, onlar Ukrayna prezidentin iyun və avqust aylarında qəbul ediblər. Rəsmi Kiyev ondan da narazıdır ki, AB Rusiya ilə bağlı şifahi bəyanatlarda da xəsislik edir və daha yumşaq ifadələrdən istifadə olunur. Ukrayna hesab edir ki, Qərb Rusiyanın Krımı ilhaq etməsi faktının mahiyyətini o qədər də dərindən hiss etmir. Ukraynanın şərqinə Rusiya qoşun və hərbi texnikasının yeridilməsini də “işğal aktı” kimi dəyərləndirə bilmir.

 Bundan başqa, Ukraynaya 15 milyard avro nağd pul gərəkir. AB isə Ukraynaya pulu az və hissə-hissə verir. Üstəlik, AB şübhələnir ki, Ukraynaya daxil olan pul korrupsiyanın güdazına gedir...

 Elbəyi Həsənli