Nərmin Kərimzadə

Radikal dindarların insanları İslama dəvəti "Ya mənim dinimi qəbul etməlisən, ya da ölməlisən" məntiqinə əsaslanır. Onların düşüncəsində demokratiya, fikir azadlığı, sevgi, hörmət, şəfqət, dostluq, fədakarlıq kimi anlayışlar yoxdur. Belə olduqda insanlar radikalları İslama dəvət edən dindarlar kimi düşünür və onların dinə baxışına görə haqq dindən çəkinirlər. Halbuki onların tam fərqli din anlayışları var. İslamı təbliğ etdiklərini iddia etsələr də, Qurana nəzər saldığımız zaman onların tam fərqli bir dinə inandıqlarının şahidi oluruq. Halbuki bu düşüncə tərzinə tək İslamda deyil, tam fərqli ideologiyalarda da rast gəlmək mümkündür. Radikal düşüncəli insanlar eyni batil dini müdafiə edir, heç bir fərqli düşüncəni, etiqadi qəbul etmirlər.

Radikallar İslamı yanlış tanıtdıqları üçün müsəlmanlara ciddi təhlükə olmaqla yanaşı, bütün dünyaya da ciddi təhlükədirlər. Onlar İslamı qorxu dini kimi tanıdaraq bütün dünyada İslamofobiyanın yayılmasına səbəb oldular. Heç kim İslam adına ortaya çıxan bu radikal qrupların yaydığı xurafatların və azğın dinin sevgi və mərhəmət dolu İslamla heç bir əlaqəsinin olmadığını ortaya çıxarmadı.

Bunun əksinə, liberal İslam anlayışı ortaya atıldı. Guya İslamın qəddar və liberal qolları var və radikallara qarşı mübarizə aparan müsəlmanlar liberal-demokrat cərəyanı təmsil edirlər. İslamofoblar liberal islamçıları müsbət qiymətləndirsələr də, radikalların qarşısında zəif hesab etdilər. Vəhşilik “din”inin sülhsevər bəzi qüvvələr tərəfindən yumşaldılmağa çalışıldığını güman etdilər. Hətta bunu İslamda islahat, Liberal İslam cərəyanının tərəfdarlarını isə islahatçı adlandırdılar. Lakin bunun islahat deyil, əsl İslam olduğunu dünyaya çatdıran olmadı. İslamofoblar “islahatçı”ları təqdir etsələr də, radikalların şiddətdən qaynaqlanan saxta gücləri və onların İslam dinini təmsil etdikləri fikri üstünlük təşkil etdi.

Bəzən də radikalların batil dinlərini tənqid edənlər özləri radikal mövqe nümayiş etdirir və xurafatları din adı altında müdafiə edirlər. Halbuki müsəlmanlar uzun illərdir İslam adı altında dünyaya yayılan xurafatları elmlə məhv etməli, radikalizmi və fanatizmi aradan qaldırmağa, Qurandan dəlillərlə İslamı düzgün tanıtmağa çalışmalıdırlar. İslam dinini asanlaşdırmağa, bu dində islahat aparmağa və ya yumşaltmağa çalışmaqdansa, xurafatçılar tərəfindən İslama atılan böhtanlara son qoymağa çalışmaq lazımdır. Əgər müsəlmanlar İslamı doğru tanıtmaq və radikalizmi yer üzündən silmək istəyirlərsə, insanlara Quranda izah olunan həqiqi İslam dinini tanıtmalıdırlar.