Bütöv Azərbaycan Mühafizəkarları Təşkilatının təşəbbüsü  ilə 24 aprel Bütöv Azərbaycan Gənclər Günü qeyd edilib.

Teleqraf.az-ın məlumatına görə, tədbir iştirakçıları ilk öncə, Şəhidlər Xiyabanını, Türk şəhidlərinin məzarlarını və  Gənclər gününün ideya müəllifi olan Milli Azadlıq Hərəkatının lideri eks-prezident Əbülfəz Elçibəyin məzarını ziyarət ediblər. Tədbirdə Türk dövlətlərinin bayraqları qaldırılıb və həmrəylik şüarları səsləndirilib.

Tədbiri açıq elən edən Bütöv Azərbaycan Mühafizəkarları Təşkilatının idarə heyətinin üzvü Vüsal Əfəndi  Gənclər günü ilə bağlı tədbir iştirakçılarına məlumat verərək, bu günün Azərbaycan və Türk dünyası üçün önəmli bir gün olduğunu deyib.

Tədbirdə iştirak edən KXCP sədrinin müavini Xəzər Teyyublu da çıxış edərək,  1997-ci ildə Əbülfəz Elçibəyin  Kələki kəndində olduğu zaman Bütöv Azərbaycan Gənclər Günü ideyasını verərkən məqsədi  Bütöv Azərbaycan coğrafiyasında yaşayan gəncləri bir ideya ətrafında birləşmələrini hədəf götürdüyünü deyərək, bu gün haqqında xatirələrini tədbir iştirakçıları ilə bölüşüb.

Tədbir Dövlət Hininin oxunması ilə yekunlaşıb.

Xatırladaq ki, 1997- ci ildə Əbülfəz Elçibəy hələ Kələkidə olarkən, onu ziyarətə getmiş bir qrup gənclə görüşündə 24 aprelin Bütöv Azərbaycan Gənclər Günü olaraq qeyd edilməsi fikrini irəli sürüb və həmin görüşdə də belə bir qərar qəbul edilib. Məqsəd isə o taylı, bu taylı Azərbaycan gəncliyini bütövlük ideyası ətrafında birləşdirmək olub. Bütöv Azərbaycan Gənclər Günü həm də qondarma “erməni soyqırımı” gününə bir cavabdır.

Elşən Əlisoy