Azərbaycan qara günün dostu olduğunu göstərdi, təşəkkür edirəm.

Teleqraf.az xəbər verir ki, bu sözləri Ankarada Türkiyə Prezidenti Rəcəb Tayyib Ərdoğan Azərbaycan Prezidenti İlham Əliyevlə birgə keçirdiyi mətbuat konfransında deyib.O, Türkiyənin hər məsələdə Azərbaycana dəstək verəcəyini bildirib:

“Çıxışımın əvvəlində azərbaycanlı qardaşlarımıza göstərdikləri mövqeyə görə təşəkkür edirəm. Biz bu görüşü, əslində, Bakıda keçirəcəkdik. Lakin Ankaradakı terrora görə, qardaşım Əliyev “biz gələk”, dedi. Görüşün Ankarada keçirilməsi bu hadisə qarşısında gücümüzü və birgəliyimizi göstərir. Mərhum Heydər Əliyevin də dediyi kimi, “iki dövlət, bir millət”, anlayışının təzahürüdür. Azərbaycan qara günün dostu olduğunu göstərdi, təşəkkür edirəm. Terrora dəstək verməyi azadlıq deyə təqdim edənlər bu qardaşlıq mesajından dərslərini almalıdır. Məsələ məkan yox, ruh və ürək birliyidir. Bazar günü baş verən terror bütün Türkiyəyə qarşı edilib. Terrorçulardan maşa kimi istifadə edənlərin özləri diz çökəcək. Dost və qardaş ölkələrin dəstəyi ilə bu dövrü keçəcəyik. Başda İlham Əliyev olmaqla, bütün azərbaycanlı qardaşlarımıza təşəkkür edirəm. Biz də işğal altında olan Qarabağ daxil, bütün məsələrdə Azərbaycanın yanında olacağıq”.