Sekuta demokratik seçki şərti irəli sürməklə iqtidara son şans verdi.

“Noyabrda azad və şəffaf seçkilərin keçirilməsi Azərbaycanın demokratik inkişafında müsbətə doğru addım kimi qiymətləndiriləcək”.

ABŞ-ın Azərbaycandakı səfirliyinin “Twitter” səhifəsində yayılan məlumata görə, bu sözləri səfir Robert Sekuta Yeni Azərbaycan Partiyasının icra katibi, sədr müavini Əli Əhmədovla görüşü zamanı deyib. Görüşdəqarşıdan gələn parlament seçkiləri ilə bərabər ölkədə siyasi vəziyyət də müzakirə edilib.

Ekspertlərin fikrincə, ABŞ səfirinin bu açıqlaması YAP hakimiyyətinə son mesaj kimi dəyərləndirilə bilər. “Qərb bir müddətdir ki, Azərbaycan hakimiyyətindən demokratik islahatlar tələb edir. Eyni zamanda seçkilərin indiki şərtlərlə keçirilməsinin məqsədəuyğun olmadığını bildirir. Sərbəst toplaşmaq azadlığına faktiki olaraq qadağa qoyulması, sekçi komissiyalarında müxalifətin təmsilçiliyinin olmaması, rəqiblərin televiziyalara buraxılmaması və s. problemlər Qərbi narahat edir. Təsadüfi deyil ki, Avropa Şurasının son qətnaməsində bu məsələlər açıq şəkildə qoyulmuşdu və Azərbaycan hakimiyyətinin qarşısında demokratik seçki tələbi irəli sürülmüşdü. Onu da diqqətdən qaçırmaq lazım deyil ki, ABŞ səfirinin YAP-dakı görüşündən əvvəl Böyük Britaniyanın ölkəmizdəki səfiri, Avropa Birliyinin Bakı ofisinin rəhbəri müxalifətlə görüşmüşdü. Bundan sonra ABŞ səfirinin Əli Əhmədovla görüşməsi və faktiki olaraq demokratik seçki şərtini irəli sürməsi hakimiyyət üçün son mesajdır”,- deyə ekpertlər bildirib.


Azadliq.info