Qalib Salahzadə: "Bələdiyyələr indidən seçilib"

Deputatların etirazlarına baxmayaraq “Bələdiyyələrin statusu haqqında” qanun dəyişdi

Parlamentin iclasında “Bələdiyyələrin statusu haqqında” qanuna edilən əlavələr layihəsi müzakirəyə çıxarılıb. Dəyişikliklər barədə məlumat verən Regional məsələlər komitəsinin sədri Arif Rəhimzadə bildirib ki, qanuna yeni 22-1 və 22-2 maddələri əlavə edilir. Bizimyol.info xəbər verir ki, layihəyə əsasən, yeni 22-1-ci (Bələdiyyə üzvlərinin səlahiyyətlərinin dayandırılması) maddədə göstərilir ki, bələdiyyə üzvlərinin səlahiyyətlərinin dayandırılması onların “Bələdiyyə üzvünün statusu haqqında” qanunun 4-cü maddəsində nəzərdə tutulmuş hüquqlarının həyata keçirilməsinin müvəqqəti dayandırılmasından ibarətdir. Bələdiyyə üzvlərinin səlahiyyətləri məhkəmənin qərarı ilə dayandırılır.

Maddədə o da deyilir ki, bələdiyyə üzvlərinin səlahiyyətləri bu qanunun 22-ci maddəsinin 5-6-cı bəndlərində nəzərdə tutulmuş əsaslarla bələdiyyə üzvünün səlahiyyətlərinin itirilməsi və xitam verilməsi ilə bağlı məhkəmədə icraata başlandığı tarixdən aşağıdakı müddətə dayandırılır:

 - bələdiyyə üzvünün səlahiyyətlərinin itirilməsi və səlahiyyətlərinə xitam verilməsi barədə məhkəmənin qanuni qüvvəyə minmiş qərarından sonra bələdiyyə tərəfindən bu qanunun 23-cü maddəsinin 2-ci hissəsinə uyğun olaraq bələdiyyə tərəfindən qərar qəbul edilənədək;

 - iş üzrə məhkəmə icraatına xitam verilməsi barədə məhkəmənin qərarı qüvvəyə minənədək.

Layihədə nəzərdə tutulan daha bir - 22-2-ci (Bələdiyyələrin vaxtından əvvəl buraxılması) maddədə göstərilir ki, Milli Məclis ona bu qanunun 52-2-ci maddəsinin 3-cü hissəsinə uyğun olaraq müraciət olduqda və bununla əlaqədar bələdiyyənin hesabatının dinlənilməsi nəticəsində onun fəaliyyətini qeyri-qənaətbəxş hesab etdikdə, Mərkəzi Seçki Komissiyası bələdiyyənin vaxtından əvvəl buraxılması haqqında qərar qəbul edir. 

Qanun layihəsinə deputatların münasibəti birmənalı olmayıb. Deputat Qüdrət Həsənquliyev MSK-nın bələdiyyənin fəaliyyətinə xitam verməsi ilə bağlı səlahiyyətin MSK-ya veriıməsini düzgün hesab etmədiyini bildirib. O, həmçinin 1700 bələdiyyənin Milli Məclisdə hesabat verməsinin mümkün olmadığını deyərək,  qanunun işləmə mexnizminin olmadığını vurğulayıb. O, layihənin düzgün hazırlanmadığı üçün onun müzakirəsini dayandırmağı təklif edib. 

Deputat Qalib Salahzadə də həmkarının dediklərini dəstəkləyərək bildirib ki, nə qədər ki, icra hakimiyyətləri bələdiyyələrə nəzarət edirlər, o bələdiyyələr yalandandır. “Artıq bələdiyyələr indidən seçilib, kim olacaq, camaat bilir. Sonra da deyirlər kadr yoxdur. Kadr var, sadəcə imkan vermirlər”. Xatırladaq ki, Prezident Administrasiyasının rəhbəri, akademik Ramiz Mehdiyev bu günlərdə çıxışında ölkədəki kadr probleminə toxunub. Akademik savadlı, qabiliyyətli, müasir idarəetməni bilən kadrların olmamasının böhranlı vəziyyət yaratdığını vurğulayıb. 

Deputat Arif Rəhimzadə isə dedi ki, bələdiyyələr bir-bir hesabat verməyəcək: “Ancaq seçicilərin sayı həddən artıq çox olan bələdiyyələrlə bağlı çətinlik olacaq. Bu zaman 10-20 iclas da ola bilər. Ancaq bu bələdiyyələrin xüsusi çəkisi 3 fazidir”.

Deputat Fazil Mustafa bildirib ki, iki seçkili qurumdan birinin digərinə hesabat verməsi düzgün deyil. Müzakirələrdən sonra layihə səsə qoyularaq qəbul olunub.