“Həsən Həsənovun yas yerində əvvəlcə Dilqəmin və Şahbazın adın yazandan sonra öz adımı yazdım”

Bu gün Fransada Azərbaycan və Ermənistan prezidentlərinin növbəti görüşü başlayır. Bu ərəfədə Azərbaycandan bir qrup vətəndaş cəmiyyəti və media təmsilçisi Fransa prezidenti Fransua Olanda müraciət edərək Kəlbəcərdə girov götürülən Dilqəm Əsgərovla Şahbaz Quliyevin geri qaytarılması üçün Serj Sərkisyana təsir etmək xahişində bulunublar.

Amma keçmiş daxili işlər naziri İsgəndər Həmidov bu cür müraciətlərin bir işə yaramayacağı qənaətindədir:

“Kəlbəcərdə öldürülən Həsən Həsənovun yas yerində əvvəlcə Dilqəmin və Şahbazın adın yazandan sonra öz adımı yazdım. Yanımda oturanlardan biri soruşdu ki, onların adın niyə yazdırırsan? Dedim ki, bəyəm onlar ölüb ki, adlarını yazmayım? Bunu eşidən mərasim iştirakçılarının üzündə çox böyük məmnunluq ifadəsini görmək lazım idi. Bir ağsaqqal gəlib üzümdən öpdü. Bildirdim ki, ağsaqqal, vallah bunu kiməsə xoş getmək üçün etmirəm, bu kəlbəcərlilərin əxlaqıdır.

Dilqəmlə Şahbazın geri qaytarılması üçün Bakıdan Fransa prezidentinə edilən müraciətdən də xəbərim var. Amma gəlin realist olaq. Artıq onların qondarma respublikada qondarma məhkəməsi başlayır. Mən bəri başdan deyim Fransa prezientinin cavabı nə olacaq. Bildirəcək ki, onların məhkəməsi başlayıb, bizim məhkəməyə təsir etmək imkanımız yoxdur, məhkəmə qərar qəbul edəndən sonra biz kiməsə müraciət edə bilərik. Yəni mən çox bədbinəm bu məsələdə və düşünürəm ki, onların qaytarılması prosesi çox çətin olacaq.”(Moderator.az)