BAKI, 3 aprel. TELEQRAF
Yaxın həftələrdə İran ABŞ və İsrailin hücumuna məruz qala bilər.
Teleqraf xəbər verir ki, bu barədə mənbələrə istinadla “Al Arabiya” məlumat yayıb.
Mənbənin həmsöhbətləri deyirlər ki, Vaşinqton və Tel-Əviv Tehrana qarşı irimiqyaslı zərbələrlə nəticələnəcək qaçılmaz eskalasiya planlaşdırır. Rəsmilərin fikrincə, hücum yaxın bir neçə həftə ərzində baş verəcək və hədəf genişmiqyaslı hava hücumları vasitəsilə İranın nüvə obyektləri olacaq.
Yaxınlaşan eskalasiya ABŞ-nin Hind okeanındakı Dieqo Qarsiya adasında B-2 bombardmançıları və yanacaqdoldurma təyyarəsi yerləşdirməsi fonunda proqnozlaşdırılır.
İran İslam İnqilabı Keşikçiləri Korpusu (SEPAH) da öz növbəsində bəyan edib ki, Tehrana hər hansı bir hücum olacağı təqdirdə İranın cavabının əks-sədası regional və qlobal məsələlərdə yeni səhifə açacaq.
Paris və Tehran arasındakı danışıqlardan sonra Fransa xarici işlər naziri Jan-Noel Barro xəbərdarlıq edib ki, nüvə danışıqları uğursuz olarsa, belə bir qarşıdurma qaçılmaz olacaq.
“Hazırda İranla yeni nüvə sazişinin bağlanması imkanları məhduddur. Tehranın nüvə proqramı ilə bağlı danışıqlar uğursuz olarsa, İranla hərbi qarşıdurma labüd olacaq. Bunun da regionda ciddi sabitliyin pozulması şəklində ağır bədəli olacaq”, - Fransanın baş diplomatı vurğulayıb.
