
BAKI, 5 iyul. TELEQRAF
Səkkiz OPEC+ ölkəsi bu günki iclasda avqust ayında gündəlik neft hasilatının 548 min barelədək artırılması barədə razılığa gəlib.
Teleqraf xəbər verir ki, bu barədə "TASS" nümayəndə heyətlərindən birindəki mənbəyə istinadən yazıb.
Xatırladaq ki, may-iyul ayları üzrə əvvəlki üç ayda bu “səkkizlik” sürətləndirilmiş hasilat artımını sutkada 411 min barrel həcmində razılaşdırmışdı. Aprel ayında isə səkkiz OPEC+ ölkəsi hasilatı sutkada 138 min barrelə qədər artırmışdı.
***
11:57
OPEC+ bu günki iclasında avqust üçün neft hasilatını gündəlik 550 min barelə qədər artırmağı nəzərdən keçirir.
Teleqraf xəbər verir ki, bu barədə "Reuters" məlumatlı mənbələrə istinadən yazıb.
Mənbələrin bildirdiyinə görə, təşkilat üzvləri avqust ayı üçün hasilatı gündəlik 550 min barelədək artırmağa hazırlaşır. Bu göstərici apreldəki 138 min barel və may, iyun və iyul aylarında təsdiqlənmiş 411 min barellik artımlardan yüksəkdir.
Qeyd edək ki, qrupa daxil olan səkkiz ölkə – Səudiyyə Ərəbistanı, Rusiya, BƏƏ, Küveyt, Oman, İraq, Qazaxıstan və Əlcəzair – avqust siyasətini müəyyənləşdirmək üçün bu gün saat 13:00-da (Bakı vaxtı ilə) onlayn formatda görüş keçirəcək.
Sözügedən səkkiz ölkə aprel ayında ən son hasilat azaldılması qərarını (gündəlik 2,2 milyon barel) tədricən ləğv etməyə başlayıb. Daha sonra may, iyun və iyulda bu artımlar sürətləndirilib, baxmayaraq ki, əlavə təchizat neft qiymətlərinə təzyiq göstərib.
Hasilatın sürətləndirilməsi bəzi üzvlərin, məsələn, Qazaxıstan və İraqın öz öhdəliklərini aşaraq planlaşdırılandan artıq neft hasil etməsi fonunda baş verib. Bu isə azalma öhdəliklərinə əməl edən digər üzvlərin narazılığına səbəb olub. Qazaxıstanın hasilatı ötən ay yenidən artaraq tarixi maksimal həddə çatıb.
Xatırladaq ki, indiyədək OPEC+ aprel–iyul ayları arasında gündəlik 1,37 milyon barel hasilat artımı elan edib ki, bu da ləğv edilən 2,2 milyon barellik azalmaların 62%-ni təşkil edir. Qrupun hələ də qüvvədə olan ümumi hasilat azalmaları gündəlik 3,66 milyon barel səviyyəsindədir.