BAKI, 5 aprel. TELEQRAF
“Bir futbolçu kimi hədəfim millinin formasını geyinmək, o qüruru yaşamaqdır".
Bu sözləri “Qəbələ”nin futbolçusu Nicat Əliyev Azərbaycan I Liqasının XX turunda səfərdə “Bakı Sporting”i 5:0 hesabı ilə məğlub etdikləri oyundan sonra Teleqraf-a açıqlamasında deyib.
24 yaşlı müdafiəçi həmklubu Şahin Şahniyarovun yığmaya çağrılmasına çox sevindiyini və onun çox yaxşı çıxış etdiyini bildirib: "Ümidvaram ki, Şahin yenə çağırılacaq və milliyə dəvət gələcəkdə bizə də nəsib olacaq”.
Əliyev "Baku Sporting"ə iki qol vurduğu və Premyer Liqaya vəsiqəni təmin etdikləri üçün özünü xoşbəxt saydığını vurğulayıb. Müdafiəçi bu uğurunda əsasən baş məşqçi Kaxaber Tsaxadadzenin təcrübəsinin rol oynadığını qeyd edib: “Bu oyun bizim üçün böyük əhəmiyyət kəsb edirdi. Sevinirəm ki, belə bir önəmli matçda iki qol vurdum. Hamı kimi “Qəbələ”nin də zəif nöqtələri var. Amma yaxşı komanda formalaşdırmışıq. Baş məşqçimizin verdiyi tapşırıqları maksimum yeri yetirməyə çalışırıq ki, bu da öz faydasını verir”.
"Qəbələ"nin futbolçusu mövsümü məğlubiyyətsiz bitirməyi hədəflədiklərini və çempion kimi elitaya qayıtmaq istəyini dilə gətirib. O, gələcək taleyini klubla danışaraq müəyyənləşdirəcəyini əlavə edib: “Bundan sonra bütün oyunlara həm çempionluq, həm də uduzmamaq üçün çıxacağıq. Elitaya vəsiqə qazanmağımız bizi heç bir halda rahatlaşdırmamalıdır. Çempion olaraq, Premyer Liqaya dönəcəyimizə inanıram. Mən də bu komanda ilə elitaya qayıtmaq istəyirəm. Hələ ötən mövsüm I Liqaya düşərkən mənə təkliflər oldu. Amma komandamı bu vəziyyətdə qoyub getmək mənə yaraşmazdı. Mövsümün sonunda klubumla danışıb, ortaq məxrəcə gələcəyik”.
Qeyd edək ki, Kaxaber Tsxadadzenin rəhbərlik etdiyi komanda bu mövsüm 20 oyunun heç birində məğlub olmayıb. 52 xalı olan “qırmızı-qaralar”ı ən yaxın qonşusu “Karvan”dan 14 xallıq fərq ayırır.
