BAKI, 5 aprel. TELEQRAF
"Məqsədim yenidən Azərbaycan milli komandasına dəvət almaqdır. Çağırılmasam da, baş məşqçinin qərarına hörmətlə yanaşacağam".
Teleqraf xəbər verir ki, bunu "Qəbələ"nin futbolçusu Şahin Şahniyarov I Liqanın XX turunda "Baku Sporting"i səfərdə 5:0 hesabı ilə məğlub edərək Premyer Liqaya vəsiqəni təmin etdikləri oyundan sonra jurnalistlərə açıqlamasında deyib.
20 yaşlı yarımmüdafiəçi Belarusla yoxlama oyununa start heyətdə başlamasını şərh edib: "Heyət açıqlananda xəbərim yox idi. Bunu sonradan öyrəndim. Çox sevindim və həyəcanlandım. O, məsuliyyəti üzərimdə hiss etdim, qürurlandım".
O, milli komanda ilə Haiti və Belarus yığmalarına məğlubiyyətin psixoloji təsirini yaşadığını bildirib: "Birdən-birə I Liqadan milli səviyyəsinə yüksəlmək çətin idi. Çünki millidə diqqət daha böyükdür. Hər kəsin gözü üzərində olur. Məğlubiyyətin psixoloji təsirini yaşadım. Hər zaman azarkeşlərimizi sevindirmək üçün çalışırıq, amma bu dəfə alınmadı".
Şahniyarov debütdən sonra millinin baş məşqçisi Fernandu Santuşla danışmadığını da açıqlayıb.
Qeyd edək ki, Azərbaycan millisi Haitiyə 0:3, Belarusa 0:2 hesabı ilə uduzub.
