BAKI, 5 aprel. TELEQRAF
"Əsas məqsədimiz çempion olmaqdır".
Teleqraf xəbər verir ki, bunu "Qəbələ"nin futbolçusu Şahin Şahniyarov səfərdə I Liqanın XX turunda "Baku Sporting"i 5:0 hesabı ilə məğlub edərək Premyer Liqaya vəsiqəni təmin etdikləri oyundan sonra jurnalistlərə açıqlamasında deyib.
Şahin Şahniyarov Premyer Liqaya asanlıqla vəsiqə qazanmayacaqlarını bildiklərini vurğulayıb: "Çətin olacağını bilirdik. I Liqa komandalarının əlverişsiz infrasturkuru, pis stadionları buna bir səbəb idi. İlk turda "Zaqatala" ilə heç-heçə etdikdən sonra çətin yolda olduğumuzu dərk etdik. Həmin bərabərlik bizim üçün daha yaxşı oldu".
20 yaşlı yarımmüdafiəçi I Liqada cəmi 2 klubun təbii örtüklü meydana sahib olduğunu bildirib: “Karvan” və “İmişli”nin meydanları təbii örtüklüdür. Amma Premyer Liqa səviyyəsində deyil. Normal ötürmə vermək olmur. Ən çox "Karvan"ın stadionunda çətinlik çəkdik. Digər meydanların demək olar ki, hamısı süni örtüklüdür və eyni səviyyədədir".
"Qəbələ"nin üzvü I Liqanın çempionu olmaq istədiklərini deyib: "Mövsümün əvvəlində Premyer Liqaya 3 klubun yüksələcəyini bilmirdik. Tək fikrimiz çempionluq olub. Bundan sonra da baş məşqçimiz Kaxaber Tsxadadze aşağı pillələrə düşməyimizə imkan verməyəcək. Əsas məqsədimiz çempion olmaqdır".
Şahniyarov Avropada çıxış etmək istədiyini vurğulayıb: "Qəbələ” ilə 2 illik müqaviləm var. Hələlik buranı düşünürəm, heç bir klubla da danışığım olmayıb. Əsas hədəfim Avropada çıxış etməkdir. Təklif olarsa, dəyərləndirməyə çalışacağam".
O, mövsümün əvvəlində "Araz-Naxçıvan"a keçidinin baş tutmamasının səbəbini açıqlayıb: "Həmin ərəfədə həm "Qəbələ" ilə 3 illik müqaviləm var idi, həm də komandanı çətin vəziyyətdə atıb getmək düzgün olmazdı. Mən bu akademiyanın yetirməsiyəm, üzərimdə əziyyətləri çoxdur".
Azərbaycan milli komandasının üzvü 2024/25 mövsümündən Premyer Liqada legioner limitinin ləğv olunmasını fonunda şans qazanmağa çalışacağını bildirib: "Nə qədər legioner olur-olsun, mübarizə aparmaq lazımdır. Açığı, mənim üçün futbolçunun milliyətinin fərqi yoxdur. Bura qədər mübarizə ilə gəlmişəm, bundan sonra da mübarizə apararaq öz yerimi möhkəmlətdirmək istəyirəm".
Şahniyarov bəyəndiyi futbolçuların adını açıqlayıb: "Azərbaycanda öz mövqeyimə uyğun Emin Mahmudovu misal çəkə bilərəm. Qara Qarayevin "Qarabağ"dakı performansını da deyə bilərəm. Ümumi dünya futbolunda isə kumir olaraq gördüyüm biri yoxdur. Ən bəyəndiyim futbolçu isə Lioner Messidir".
