BAKI, 2 aprel. TELEQRAF

Avropa ABŞ Prezidenti Donald Trampın yeni ticarət tarifləri tətbiq etməsi fonunda 1930-cu illərdən sonra görmədiyi ticarət məhdudiyyətləri ilə üzləşəcək.

Teleqraf xəbər verir ki, bu fikirləri Avropa Komissiyasının ticarət üzrə baş direktorluğunun keçmiş əməkdaşı İqnasio Qarsiya Bersero “Politico” nəşrinə müsahibəsi zamanı səsləndirib.

"Trampın etdikləri, əslində, dünya ticarət qaydalarını tamamilə məhv etməyə cəhddir. O, 1930-cu illərdən sonra görmədiyimiz səviyyədə tariflər tətbiq edəcək ", - İqnasiyo bildirib.

Onun sözlərinə görə, Brüssel buna cavab olaraq "Antiməcburiyyət Aləti" (ACI) adlanan mexanizmi işə salmalıdır. ACI 2023-cü ildə qüvvəyə minib və Avropa İttifaqını üçüncü ölkələrin iqtisadi məcburiyyətlərindən qorumaq məqsədi daşıyır.

Rəsmilərin fikrincə, Ağ Ev rəhbərinin Danimarkanı Qrenlandiyanı verməyə məcbur etməsi və ya Avropa İttifaqını ABŞ-nin texnologiya şirkətlərinə qarşı tədbirlərdən çəkinməyə təhrik etmək üçün tariflərdən istifadə planı bu alətin tətbiqinə əsas yarada bilər.

Sözügedən mexanizm, həmçinin Aİ-yə xarici investisiyaların qarşısını almaq, bankçılıq, sığorta və digər maliyyə xidmətləri bazarlarına çıxışı məhdudlaşdırmaq imkanı verir.