BAKI, 6 iyun. TELEQRAF

ABŞ Prezidenti Donald Trampın sülhməramlı rolundan getdikcə uzaqlaşdığı bir vaxtda Ukrayna öz xüsusi xidmət orqanlarından həmişəkindən daha çox asılıdır.

Teleqraf xəbər verir ki, bu fikir “The Washington Post”un köşə yazarı Devid İqnatiusun “Ukraynada çirkli müharibə hələ indi başlayır” adlı köşə yazısında bildirilir.

Onun kəşfiyyatdakı mənbələrinə görə, Ukrayna xüsusi xidmət orqanları artıq Moskvaya qarşı yeni mürəkkəb əməliyyatlar da hazırlayır. Jurnalist qeyd edir ki, hər iki tərəf dalandan çıxmaq istəyir və Ukrayna Milli Təhlükəsizlik Xidmətinin “Hörümçək toru” əməliyyatı buna cəsarətli cəhd idi.

Genişmiqyaslı müharibə zamanı Milli Təhlükəsizlik Xidməti (SBU) və Baş Kəşfiyyat İdarəsi Ukrayna xüsusi təyinatlılarının “Mən sənin üçün gəlirəm” şüarını reallığa çevirir. İqnatius Ukrayna xüsusi xidmətlərini ABŞ Federal Təhlükəsizlik Xidməti və Mərkəzi Kəşfiyyat İdarəsi ilə müqayisə edir.

Jurnalist xatırladır ki, uzun illər SBU öz sıralarında çoxsaylı rus agentlərinin olmasında ittiham olunsa da, iyunun 1-də Rusiyanın strateji təyyarələrinin məhv edilməsi əməliyyatı gizli saxlanılıb.

Kəşfiyyat mənbələrinə görə, xidmətin rəhbəri Vasili Malyuk əməliyyat barədə yalnız Prezident Volodimir Zelenskini məlumatlandırıb. Hətta Malyukun birinci müavini də bundan xəbərsiz olub:

“Ukrayna cəbhə xətti pilotsuz təyyarələr və artilleriya ilə dolu bir cəhənnəm olaraq qalacaq. Amma gizli əməliyyatlar cəbhədən kənarda məqsədyönlü sui-qəsdlər, təxribatlar və müvafiq olaraq Ukrayna və Rusiyaya silah verən ölkələrə yönəlik zərbələrlə “çirkli müharibəyə” çevrilə bilər”.