Yaltaqlıq, məddahlıq insanı alçaldan xarakterlərdir. Təəssüf ki, cəmiyyətimizdə bu sahədə dırnaqarası inkişaf var və bu da ciddi problemlər yaşadır. Məsələ o həddə çatıb ki, tələbə yaşlı gənclər yaltaqlıq, məddahlıq məsələsində 60 yaşlı bəzi şəxsləri də üstələyirlər.

Kənardan baxanda bəlkə də məsələ o qədər problem doğurmur. Ancaq həyatını məddahlıq üzərində quran, yaltaqlığı həyat tərzinə çevirən gənclik ölkəni doğru gələcəyə apara bilməz.

Ətrafında baş verənlərə obyektiv (tənqidi demirik-red.) münasibət sərgiləyə biməyənlər ictimai təhlükəli adamlar hesab edilir. Onların sayının coxalması, onların gəncləşməsi yalnız təəssüf doğurur.

Cəmiyyətimizin, millətimizin məhvinə yönəlmiş bu pis vərdişin qarşısını necə almaq olar?.. 

Milli Məclisin deputatı Fazil Mustafa modern.az-a açıqlamasında yaltaqlığı millətin məhvinə yönəlmiş addım kimi qiymətləndirməyib.

“Yaltaqlıq uzun əsrlərdir bizdə formalaşmış və hətta mentalitetin içərisində ciddi faiz təşkil edən xüsusiyyətdir. Yaltaqlıq bu gün bəziləri tərəfindən sağlamlıq, bəziləri tərəfindən isə xəstəlik amili kimi qəbul olunur. Yaltaqların daha çox yaşaması, daha çox imkan sahibi olması müşahidə edilir. Ona görə bunu məhvə aparan kimi qiymətləndirməyək. Bu, bir xəstəlikdir və bu xəstəlik cəmiyyətin bir az feodal təbiətindən irəli gəlir. Hər kəs özündən bir pillə yuxarını özünün ağası hesab edir. Ona görə də bu formada münasibətlər qurmağa çalışır”. 

Deputat vurğulayıb ki, normal, azad cəmiyyətlərdə yaltaqlığa ehtiyac olmur.

“Bəzən insanların gərəyi olmur, amma xarakter olaraq yaltaqdır. Əslində, ictimai qınaq da var. 

İnsanlar məqsədyönlü şəkildə tərif yağdırmağı da qınayırlar. Bu qınanma cəmiyyətdə öz təsir gücünü o qədər də göstərmir. Ona görə də daha azad və qapalı olmayan cəmiyyətlərdə belə məsələlərə ehtiyac olmur. Məsələn, bu cəmiyyətlərdə rəhbərə, direktora, müdirə yaltaqlanmağa ehtiyac olmur, çünki onun mövcudluğunu qanun qoruyur. Qanun qoruduğu üçün kiminsə xoşuna gəlib-gəlməmə həmin şəxsin fəaliyyətinə çox təsir etmir. Bizdə isə insanların taleyi subyektiv amildən asılı olduğu üçün bu xüsusiyyəti özlərində daşıyırlar”. 

F.Mustafa insanların genində formalaşmış yaltaqlığı aradan qaldırmağın çətin proses olduğunu vurğulayıb.

“Hesab etmirəm ki, bu xüsusiyyət millətin məhvinə gətirir, çünki mənfi cəhətlər uzun müddət orqanizmin yaşamasına səbəb olur. Belə görünür ki, bu da orqanizmdə tarixən formalaşmış xüsusiyyətdir. Mədhiyyə janrında uzun illər əvvəl hekayələr, şeirlər yazılıb. Şəxsiyyətinə hörmət edənlər yaltaqlıqla məşğul olmasınlar. Cəmiyyətdə yaltaqların sayını azaltmaq üçün şəxsiyyətinə hörmət edənləri çoxlatmaq lazımdır”.