Rusiya Azərbaycanın da yer aldığı bölgənin yaxınlığında gələn il misli görünməmiş hərbi təlimlər planlaşdırır; rusların separatçı Abxaziya ilə ortaq ordu yaratmağa başlaması təsadüfdümü? 

 Rusiya hər nə qədər Qərbin iqtisadi sanksiyalarından əziyyət çəksə də, neft və rubl dəyərdən düşməyə başlasa da, hələ ki özünün “Yaxın xaric” siyasətinə pozitivə dəyişiklik etmək istəyində görünmür. O sırada Ukrayna məsələsində Moskva beynəlxalq birliyin umduğu konstruktiv mövqeyi sərgiləməyə tələsmir.

 Doğrudur, Putinin 2014-cü ilə planlaşdırdığı Avrasiya layihələri yarımçıq qaldı, ancaq belə görünür, Kreml başçısı ümidlərini də itirməyib. Əksinə, gələn il üçün layihələri başa çatdırmaqdan ötrü daha məkrli planlar cızmağa, taktikaya müvafiq düzəlişlər eləməyə hazırlaşır. Düzəlişlərin qayəsində isə hərbi amil dayanır. Bir az da dəqiq desək, söhbət yaxın-uzaq qonşuları hərbi güclə hədələmək faktorundan gedir. 

 Nəzərə alsaq ki, şimal qonşumuzun xarici siyasət kursunda hərbi güclə hədələmək, hərbi müdaxilə daim həlledici rolda olub, o zaman yeni planların dünya və region üçün təhlükəlilik dərəcəsi bəlli olar. İkinci yandan, daxili sosial-iqtisadi durumun pisləşməsi fonunda Putinin reytinqinin tədricən düşməsi Rusiya rəhbərliyini istər-istəməz xarici siyasətdə tezliklə ildırımsürətli uğur əldə edib bunu “kompensasiya” eləmək zərurəti yaradır. Uğur isə yeganə olaraq hərbiyyəyə bağlıdır, çünki ölkə dünya və bölgə üçün xammal mənbəyindən savayı hər hansı iqtisadi-texnoloji maraq kəsb eləmir, bu sahələr üzrə o, qabaqcıllıq nümunəsi sayılmır.

 Bu və başqa səbəblərdən Putin son zamanlar Rusiya silahlı qüvvələrinin gücləndirilməsinə, ordunun daha modern hərbi texnika ilə təmin edilməsinə xüsusi diqqət ayırır. Büdcə gəlirləri bəlli səbəblərdən azalsa da, paralel surətdə böyük silah satışı hesabına nəzərdə tutduğu hərbi islahatları maksimum qısa zamanda yekunlaşdırmağa çalışır. Eyni zamanda ordunun döyüş qabiliyyətinin qaldırılması qayğısına qalır. 

 Bu, həm də ona görə lazımdır ki, Putin 2015-in postsovet məkanı uğrunda Qərblə geosiyasi savaşda həlledici il olacağını bilir. Təsadüfi deyil ki, üzümüzə gələn il Azərbaycanın da yer aldığı cənub istiqamətində şimal qonşumuz indiyədək misli görünməmiş sayda hərbi təlim keçirməyi planlaşdırır: "RİA-Novosti"nin hərbi mənbələrə istinadən verdiyi məlumata görə, 2015-ci ildə Cənub Hərbi Dairəsi 20-dən artıq geniş miqyaslı təlim həyata keçirəcək, bu təlimlərə rekord sayda - on minlərlə hərbi qulluqçu və ən müxtəlif qoşun növləri, müasir hərbi donanma və HHQ vahidləri cəlb olunacaq.

Hərbi təlimlər isə şübhə yox ki, döyüş hazırlığını artırmaqla yanaşı, qonşulara, rəqib dövlətlərə güc nümayişidir. Deməli, növbəti il Rusiya öz “sözəbaxmaz” qonşularını daha sərt şəkildə təhdid eləməyi hədəfləyib. 

 Ötən həftə Rusiya ilə separatçı Abxaziya arasında ortaq hərbi qüvvələr yaratmaq və sərhədləri birgə qorumaq haqda imzalanan və dərhal da ratifikasiya edilən müqavilə də eyni kontekstdə qiymətləndirilə bilər. Qərb ölkələrinin sərt etirazlarına baxmayaraq bu “sənədlə” Moskva strateji bir bölgənin burnunun ucunda hərbi mövcudluğunu gücləndirmək üçün bir növ, yeni legitimlik qazanmış olub. Onu da nəzərdən qaçırmaq olmaz ki, Azərbaycanın şimal sərhədi boyu onsuz da illərdir böyük hərbi texnika və canlı qüvvə cəmləşdirib.       

 Beləliklə, şimaldan Azərbaycana, digər bölgə ölkələrinə təhdidlərin daha qorxulu qiyafədə növbəti ilə keçdiyini təxmin eləmək olar. Təbii ki, bu yeni çağırışları ilk növbədə “heç bir bloklara qoşulmayan” Azərbaycan hesaba almalıdır. Necə? O, artıq ölkəmizin  Milli Təhlükəsizlik Konsepsiyasının diktə elədiyi şərtlərdən asılıdır. 

 Qorx ki, kontur-tədbirlər qismində Bakının Moskva ilə  ildən-ilə genişlənən hərbi-texniki əməkdaşlığı da kara gəlməsin. Hər halda, Rusiya rəsmiləri və diplomatları dəfələrlə bəyan ediblər ki, Azərbaycanla silah ticarəti sırf kommersiya məsələsidir və burada ayrı məna axtarmaq lazım deyil. Yəni bir daha Kremlin hərəkətlərinin proqnoza yatımlı olmadığı üzə çıxır.

 Musavat.com