QAT adıçəkilən qurumun rəhbəri Akif Nağının Gürcüstana buraxılmaması ilə bağlı xarici işlər naziri Elmar Məmmədyarova müraciət edib. Azərbaycan, Türkiyə və Gürcüstan xarici işlər nazirlərinin Tiflis görüşü ərəfəsində ünvanlanan müraciətdə deyilir: 

“Bu il dekabrın 21-22-də Tiflisdə Azərbaycan, Türkiyə, Gürcüstan xarici işlər nazirlərinin nəzərdə tutulan görüşü ilə bağlı Sizə müraciət edirik. Bu görüşlərin üç ölkə arasında xoş münasibətlərin inkişafına xidmət etdiyi heç kəsdə şübhə doğurmur. Bu görüşlər həm də mövcud problemlərin aradan qaldırılmasına xidmət etməlidir. Bir daha diqqətinizə çatdırırıq ki, Akif Nağı 2014-cü ilin iyun ayından etibarən Gürcüstana buraxılmır. Bu məsələ ilə bağlı biz bir neçə dəfə sizə müraciət etmişik. Həmçinin dəfələrlə Gürcüstanın prezidenti, baş naziri, xarici işlər nazirinə məktub göndərmişik, Gürcüstanın Azərbaycandakı səfiri və konsulu ilə görüşmüşük. Lakin bu günə qədər Gürcüstan tərəfindən müraciətlərimizə heç bir konkret və məntiqli cavab verilməyib, Gürcüstan rəhbərliyinin bu qərarının heç bir səbəbi açıqlanmayıb”. 

QAT bəyan edib ki, qadağa təşkilatın işinə mane olur: “...Bu qərar Azərbaycanla Gürcüstan arasındakı xoş münasibətlərin xarakterinə qətiyyən uyğun gəlmir. Biz burada erməni izinin olduğunu düşünürük. Xahiş edirik ki, Tiflis görüşü zamanı bu məsələni də gündəmə gətirib, müsbət həllinə nail olasınız”. 

Müraciətdə deyilir ki, biz Gürcüstanla münasibətlərin xoş olmasını istəyirik, ancaq Gürcüstan rəhbərliyinin bu qərarını xoşniyyətli addım hesab etmək olmaz. QAT xəbərdarlıq da edib: “Məsələ yaxın vaxtlarda həllini tapmasa, biz kəskin addımlar ata, məsələn, Gürcüstan rəhbərliyinə daxil olan rəsmiləri, prezidenti, baş naziri, xarici işlər naziri, müdafiə nazirini arzuolunmaz şəxs elan edə, onların Azərbaycana səfərlərini etiraz aksiyaları ilə qarşılaya və digər tədbirlərə əl ata bilərik. Biz məsələnin bu həddə çatmasını istəmir və bizim müraciətə diqqətlə yanaşacağınıza inanırıq”.

QAT-ın müraciəti ilə bağlı XİN-dən “Yeni Müsavat”a bildirdilər ki, məsələni araşdırandan sonra cavab veriləcək.