Tərtər rayonunun sabiq icra başçısı, Tərtər Özünümüdafiə batalyonunun keçmiş komandiri Sərdar Həmidov Modern.az saytına açıqlamasında son vaxtlar ölkədə baş verən hadisələrə diqqət çəkib.

Onun sözlərinə görə, müharibə şəraitində olsaq da,  bəzi adamlar dövlətçilik hissini itirib.

“Hakimiyyətdə olan qüvvələr dövlətin naminə çalışmalıdır. Əmrə qulaq asıb işğal altındakı əraziləri azad etmək lazımdır. Dövlətə qarşı çirkin işlər həyata keçirmək yox. Ölkədə talançılıq etməklə dövlət başçısının, güc nazirliklərinin fikrini Qarabağdan yayındırmağa çalışırlar. Belə hərəkətlərə yol verməklə öz istəklərinə çata bilməyəcəklər. Bütöv şəkildə torpaqları geri qaytarmalıyıq. Yerevan şəhəri İrəvana çevrilməlidir. 100 il bundan qabaq şəhərin adı nə olubsa, o da qaytarılmalıdır. Ermənilər tamamilə sıradan çıxmalıdır”.

Keçmiş döyüşçü “MTN-işi” ətrafında baş verənlərə toxunaraq deyib ki, bu cür əməlləri həyata keçirənlər bekarçılıqdan belə işlərə gediblər.

“Təsəvvür edin. Sobanın içində od yoxdursa o yanarmı?! Əlbəttə yox!  Dövlətin daxilində yerləşən güc nazirlikləri də dövlət başçısının ətrafında birləşməsə, dövlət başçısına tabe olmasa, bu cür hadisələr baş verəcək. Qarabağı azad etmək lazımdır. Bəsdir, dövlətin başına bu qədər oyunlar açdılar. Hamı müharibədə iştirak etməlidir. Müharibə olsaydı, MTN-nin bu cür çirkin işləri ortaya çıxmazdı. Bu boyda nazirlik bekarçılıqdan dövlətə lazım olmayan işlərə əl atıb. Göründüyü kimi, işsiz-gücsüz adamlar imiş. İşə baxın ki, ölkədəki güc strukturları bacarıqsız işlərlə məşğul imiş. Dövlət təhlükəsizlik orqanı işçilərinin tutduğu əməllərə baxın! Ölkənin generalı, polkovniki palçıqda işləyən fəhlədən rüşvət yığırmış. Bu, biabırçılıqdır. Bizim də torpaqları erməni əkir, becərir varlanır. Sonra da gedib dünyaya səs salırlar ki, torpaqlar  əzəldən onların olub, indi də onlarındır. Sizinlə danışdıqca, içimdən müharibəyə getmək keçir. Bu dəqiqə də əlimə silah alıb vuruşmağa hazıram. Əldə olan silahların hamısı dövlətə təhvil verilməlidir. Əhali arasında namaz qılan da, namaz qılmayan da prezidentin ətrafında sıx birləşməlidir”.

Sərdar Həmidov əgər müharibə başlasa, bir ayın içində Azərbaycanın qələbə çala biləcəyinin mümkün olduğunu deyib.

“Əgər müharibə başlasa hansı istiqamətdə döyüşü başlamağı dəqiq bilirəm. Bir ayın içində üçrəngli bayrağımızı Ağdərəyə və Şuşaya sancmaq olar.

Təbii ki, cənab prezidentin yerinə danışa bilmərəm. Amma Nardaran hadisələri, “MTN işi” olmasaydı bəlkə də müharibə başlaya bilərdi”.