"Bizim bu günümüzə düşməyimizdə daha çox harın məmurların və oliqarxların rolu vardır."

Azərbaycan hakimiyyəti ilə Avropa dövlətlərinin arasında baş verən gərginlik, Azərbaycan ziyalılarınıda ciddi narahat edir. Teleqraf.az-ın məlumatına görə, bu hadisələrə münasibət bildirərək, “ Bizim güclüyüyümüz həm də demokratik seçkilərin keçirilməsindədir “ deyən Tarixçi alim Dilavər  Əzimli özünün “Facebook” səhifəsində bunları yazıb:

"Bu gün Azərbaycanla bağlı Avropa dövlətlərinin atdığı addım bizləri də dərindən narahat edir. Biz Azərbaycanı təlatümsüz görmək istəyirik. Biz bu dövlətçilik uğrunda şəhidlər verdik. Bizim şəhidlərin üzərindən rus tankları keçdi. Mənim üçün güclü, demokratik Azərbaycan vacibdir. Azərbaycanın bir qarışını da nə Rusiyaya, nə Avropa, nə də ABŞ dövlətlərinə qurban vermərəm. Bu dövlətçilik bizim milli namusumuzdur. Amma dövlətçiliyə ziyan gətirən bir sıra səbəblər vardır. Şəxsən inanıram ki, ölkə başçısı özündə güc tapıb bu məsələdə obyektiv addım atacaqdır. Çıxışlarında dəfələrlə məmurları tənqid edib. Onlara özlərini yığışdırmağı tövsiyyə edib. Hesab edirəm ki, bu xəbərdarlıq idi. İndi qəti addımların zamanı çatıbdır. İnanmıram ki, ölkə başçısı Azərbaycanın hansısa dövlətin boyunduruğuna girməsinə razı olsun. Bizim bu günümüzə düşməyimizdə daha çox harın məmurların və oliqarxların rolu vardır. Azərbaycanda həddini aşan bu məmurlar və oliqarxalar ölkənin hüquq-mühafizə sisteminə qədər təsir imkanlarına malikdlrlər. Bu baxımdan ölkəmizdə bəzi hakimlərin "fəaliyyəti" də Avropanın bizə qarşı çıxardığı bəyanatlara səbəb olubdur. Bəzi deputatlarımızın o qədr sərvəti vardır ki, onlara deputat kimi yox, milyarder kimi baxırlar. Məmur balalarının hərəkətləri Ərəb şeyxlərinin hərəkətlərini də ötübdür. Bunu zərbəsi isə Azərbaycana dəyir. Qarşıdan parlament seçkiləri gəlir. Artıq siyahıların hazır olduğunu bəyan edirlər. Yəni, yerlər zəbt olunub. Sanki vəzifəyə təyin olunurlar. Əminəm ki. ölkə başçısının əli ilə bu siyahı məsələsi darmadağın olunacaqdır. Bundan əlavə, sentyabrın 14-də keçiriləcək Milli Məclisin iclası ölkə başçısının nəzarəti altında olacaqdır. Bizim güclüyüyümüz həm də demokratik seçkilərin keçirilməsindədir. Bizim güclülüyümüz və Azərbaycanın təlatümsüz ötüşməsi ölkədə islahatların həyata keçirilməsi, inhisarçılığın aradan götürülməsindədir. Biz "Azərbaycan Alimlər Birliyi" olaraq ölkə başçısına bu istiqamətdə hər cür yardım etməyə hazırıq!"