|
QAT, KXCP və AXCP-nin Ağsu rayon şöbələri Qarabağ Azadlıq Təşkilatının girovlarla bağlı keçirdiyi aclıq aksiyasını dəstəkləyən bəyanatla çıxış ediblər.
Teleqraf.az-ın xəbərinə görə,bəyanatda göstərilir: Azərbaycan ərazisinin 20%-ni uzun müddət işğal altında saxlayan Ermənistanın Kəlbəcərdə, öz ata-baba torpaqlarını ziyarətə gedərkən girov götürdüyü Dilqəm Əsgərov və Şahbaz Quliyev üzərində qurduğu məhkəmə şousuna Beynəlxalq qurumların biganəliyi, hətta tərəfsiz münasibət bildirməkdən imtina etmələrini ədalətli hesab etmir, bu biganə münasibəti Azərbaycanın ərazi bütövlüyünə qarşı hörmətsizlik kimi dəyərləndiririk.
Öz doğma torpağında, ata-baba ocağında valideynlərinin qəbrlərini ziyarət edən insanların, heç bir ölkənin və beynəlxalq təşkilatların dövlət olaraq tanımadığı, qondarma bir rejimin terrorçuları tərəfindən girov götürülməsinə dünya dövlətlərinin və nüfuzlu beynəlxalq təşkilatların biganə qalması bizi çox narahat edir.
Biz bir daha Beynəlxalq Təşkilatlardan bu qəbildən olan problemlərə, həmçinin işğal olunmuş Azərbaycan ərazisi olan Kəlbəcərdə erməni terrorçularının giorv götürdüyü insanların məsələsinə subyektiv amillərdən deyil, beynəlxal hüququn müddəalarına uyğun yanaşmağı tələb edirik.