|
KXCP-nin mərkəzi qərargahında siyasi partiyaların növbəti toplantısı olub. Toplantıda KXCP, Müsavat, ADP, Azadlıq, Ümid, Liberal Demokrat, AXP, BAP, Azad Demokratlar, Aydınlar , VİP iştirak edib.
Toplantıda:
1. Son dövrdə siyasi məhbuslara qarşı həbs yerlərində təqib və təzyiqlərin davam etdirilməsi məsələsi müzakirə edilib. Leyla Yunus, İntiqam Əliyev, Arif Yunusov, Rəsul Cəfərovun həbsinin daha 3 ay uzadılması pislənilib. Mövsüm Səmədov və Taleh Bağırovun qapalı həbsxanaya köçürülməsi barədə məhkəmə qərarları siyasi repressiya aktı, işgəncə faktı kimi dəyərləndirilib və həmin qərarların ləğv edilməsi tələb edilib. İntiqam Əliyevin səhhətinin pisləşməsi barədə informasiyalardan xüsusi narahatlıq ifadə olunub və qərara alınıb ki, onun haqqında həbs qəti imkan tədbirinin təxirə salınmadan ləğv edilməsi barədə istintaq orqanlarına müraciət edilsin.
2. Partiya sədrlərinin Leyla Yunus, İntiqam Əliyev, Fərəc Kərimov, Taleh Bağırov və Mövsüm Səmədovla görüşməsi üçün həmin şəxslərin saxlandığı həbs yerlərinin müdiriyyətlərinə müraciət edilməsi qərarlaşdırılıb.
3. Erməni terrorist birləşmələri tərəfindən girov götürülən Kəlbəcər rayon sakinləri Şahbaz Quliyev və Dilqəm Əsgərovun vəziyyəti müzakirə edilib. Qeyd edilib ki, həmin şəxslərin azad edilməsi sahəsində müəyyən işlər görülməsinə baxmayaraq bu kifayət sayıla bilməz. Azərbaycan hakimiyyətinə bir daha müraciət edilərək həmin şəxslərin azad olunması üçün bütün imkanlardan istifadə edilməsi istənilib. Habelə, məsələ ilə bağlı siyasi partiyaların dünya ictimaiyyəti ilə təmaslarının artırılması lazım bilinib.
4. “Siyasi məhbuslar qeydsiz şərtsiz azad edilsin” şüarı ilə Demokratiya və İnsan Haqları Mərkəzinə daxil olan siyasi partiya sədrləri tərkibində piket keçirməsi barədə Bakı Şəhər İcra hakimiyyətinə xəbərdarlıq göndərilməsi barədə qərar qəbul edilib. Piketin tarixi haqqında əlavə məlumat veriləcək.
5. 05 noyabr 2014 cü il saat 12-00 da Müsavat Partiyasinin qərargahinda - Milli Məclisə seçkilərdə proporsional seçki sisteminin bərpa edilməsi məqsədi ilə referendum keçirilməsi təşəbbüsünə həsr edilmiş Dəyirmi Masa keçirilməsi qərara alınıb.
6. DİHM nümayəndələrinin Polşa səfirliyində görüşü barədə məlumat dinlənilib.
7. Ukraynada parlament seçkiləri və bu seçkilərin Azərbaycana təsiri müzakirə edilib.
8. Bələdiyyə seçkilərinə münasibət barədə fikir mübadiləsi aparılıb.
musavat.com