Tural Abbaslı: “Mən özümü başqanlığa hazır görürdümsə, deməli, partiyada digər ciddi postlara da hazır bilirəm."

Bu gün Müsavat Partiyası Məclisinin iclası keçiriləcək. Toplantıda qurultaydakı seçkilərdə boş qalmış Məclis üzvü yerinə, həmçinin Mərkəzi Nəzarət Təftiş Komissiyasında boş olan 7 yerə seçkilər keçiriləcək. Artıq dünəndən namizədlərin irəli sürülmə müddəti başa çatıb.

Hazırda müsavatçılar arasında əsas müzakirə edilən məsələlər sırasında Məclis sədrinin və partiyanın  Mərkəzi İcra Aparatı rəhbərinin kimlər olacağı yer tutur. Qeyd edək ki, nizamnamənin tələbinə görə Məclis sədri partiyada başqandan sonra ikinci postdur. Məclis sədri Məclis üzvləri sırasından gizli səsvermə ilə seçilir. Mərkəzi İcra Aparatının rəhbərini isə partiyanın başqanı təyin edir. Bu post Müsavatda faktiki olaraq generator rolunu oynayır. Partiyanın strukturları, rayon şöbələri ilə birbaşa olaraq Mərkəzi İcra Aparatının rəhbəri işləyir. Qurultaya qədər həmin vəzifədə Arif Hacılı təmsil olunurdu. 

Məclis sədri və Mərkəzi İcra Aparatının rəhbəri vəzifələri partiyada mühüm postlar olduğundan orada təmsilçilik əldə etmək istəyənlər az deyil. Əldə etdiyimiz məlumatlara görə, Müsavat Məclisinin sədrliyinə tanınmış müsavatçı, vəkil Osman Kazımov, başqanın sabiq müavini Gülağa Aslanlı, Məclis üzvü Nüşabə Sadıqlı, başqanlığa sabiq namizəd Tural Abbaslı iddialıdırlar. Mərkəzi İcra Aparatının rəhbəri vəzifəsinə yeni başqanın kimi təyin edəcəyi barədə isə ehtimallar irəli sürülür. Bildirilir ki, Gülağa Aslanlının Məclis sədri olmayacağı halda bu posta təyin edilmək şansı yüksək şəxsdir. Müsavat Məclisinin üzvü Elman Fəttahın və Tural Abbaslının da Mərkəzi İcra Aparatının rəhbəri təyin olunmaq şanslarının da olduğu deyilir. Mənbənin sözlərinə görə, baxmayaraq ki, Tural Abbaslı başqan seçkilərində Arif Hacılının rəqiblərindən biri olub, yeni başqanın jest olaraq Abbaslını sözügedən vəzifəyə təyin etməsi istisna deyil. 

Bu barədə fikirlərini öyrəndiyimiz Tural Abbaslı hələ ona partiyada hər hansı vəzifə təklif olunmadığını dedi: “Hələ partiyanın İcra Aparatı tam şəkildə formalaşmayıb. Düzdür, Arif bəyin qərarı ilə köhnə İcra Aparatı işçiləri işlərini davam etdirirlər. Amma hələlik yeni təyinatlar olmayıb. İcra Aparatının rəhbərinin kim təyin olunması birbaşa başqanın səlahiyyətindədir. Başqan kimi məsləhət biləcəksə, onu da təyin edəcək. Mən Arif bəyin seçiminə, təyinatına müdaxilə eləmək fikrində deyiləm. Kimi istəsə təyin edə və onunla işləyə bilər. Bu, onun hüququdur. Əsas odur ki, İcra Aparatının rəhbəri Müsavat Partiyasının ümumi işinə xeyir verən və partiya işini ciddi bilən adam olsun. Aparat rəhbəri birbaşa təşkilati, icra məsələlərinə rəhbərlik edəcək. Ona görə də həmin şəxsin praktik təcrübəsi olmalıdır, Müsavatın içini tanımalıdır, rayon təşkilatlarını yaxından tanımalıdır, Müsavatın strukturlarına birbaşa bələd olmalıdır, seçkilərdə yaxından iştirak eləmiş adam olmalıdır. Təkcə nəzəri təcrübə yetərli deyil”.

“Özünüzü həmin meyarlara cavab verən şəxs hesab edirsinizmi” sualına T.Abbaslı belə cavab verdi: “Mən özümü başqanlığa hazır görürdümsə, deməli, partiyada digər ciddi postlara da hazır bilirəm. Mənə İcra Aparatının rəhbəri vəzifəsi təklif olunmayıb. Olunacağı təqdirdə, düşünərik. Hələ olmayan hal haqda dəqiq fikir söyləyə bilmərəm”. 

T.Abbaslı bildirdi ki, Məclis sədrini Məclisin üzvləri seçdiyi üçün burada yarışdan daha çox konsensus lazımdır: “Məclisin idarə olunması daha birləşdiricilik və ortaq ümumi cəhət tələb edir, nəinki digər postlar. Məclisin sədri seçilmək üçün ümumi sayın 50+1 faizinin səsini almaq lazımdır. Məclisin bugünkü tərkibi isə onu deməyə əsasa verir ki, üçüncü bir tərəfin təkbaşına Məclis sədrliyinə namizədliyini verib onu seçdirmək imkanı yoxdur. Ona görə mən dedim ki, bu məsələ daha çox konsensusdan asılıdır. Konsensus olacaqsa mən də Məclis sədrliyinə namizədliyimi irəli sürə bilərəm. Çünki Müsavat Məclisinin üzvü olmaq həm böyük məsuliyyət, həm də şərəfdir”.

musavat.com