Azərbaycan nümayəndə heyətinin üzvü Rafael Hüseynov iclasda çıxış edərək deyib: “Məruzədə bəzi ölkələrdə QHT-lərin qeydiyyata alınması prosesinin uzun çəkməsi, bununla əlaqədar müəyyən süni çətinliklərin yaradılmasından bəhs edilir. Təəssüf ki, məruzənin ilkin mətnində bu sıraya Azərbaycanın da adı daxil edilib. Əgər siz Azərbaycandakı QHT-lərin sayını Cənubi Qafqazda bizim qonşularımız olan Gürcüstan və Ermənistanla müqayisə etsəniz, özünüz nəticə çıxara bilərsiniz. Azərbaycanda belə təşkilatların sayı adları çəkilən iki ölkədə birlikdə olan QHT-lərin sayından xeyli çoxdur.

Lakin QHT şəbəkəsi ilə bağlı bir neçə məqam var ki, onlar barədə ciddi düşünməyə ehtiyac duyulur. Təəssüf ki, müşahidələrə əsasən, bir sıra hallarda QHT-ləri, onların ayrı-ayrı təmsilçilərini müəyyən siyasi dairələr və xarici xüsusi xidmət orqanları bilavasitə məşğul olduqları işlərdən ayıraraq məxfi kəşfiyyat fəaliyyətinə cəlb edirlər, həm Azərbaycanda, həm də bir sıra digər Avropa ölkələrində. Qısa müddətdə həmin şəxslərin demokrat obrazını da formalaşdırırlar ki, konkret ölkələrdə onlara qarşı qanun çərçivəsində tədbirlər görüləndə bunu demokratiya əleyhinə hərəkətlər kimi qələmə versinlər. Məxfi məqsədlərini gerçəkləşdirmək üçün xarici donorlar müxtəlif layihələri maliyyələşdirmək adı ilə həmin təşkilatlara külli miqdarda vəsaitlər də ayırırlar. Belələri ifşa olunanda, cinayət məsuliyyətinə cəlb ediləndə isə onlara havadarlıq edənlər hay-küy salmağa, guya ölkədə demokratlar, QHT-lər təqib edilirlər kompaniyasına rəvac verirlər.

Azərbaycan hazırda Avropa Şurası Nazirlər Komitəsinə sədrlik edir. Bu fəaliyyətlərə başlayarkən ölkə sədrlik dövründəki prioritetləri, hansı istiqamətlərə daha çox diqqət ayıracağını elan etmişdi. Korrupsiyaya qarşı mübarizə belə istiqamətlərin ən birincilərindəndir. Həmin kontekstdə Azərbaycanda genişmiqyaslı iş aparılmaqda və bəhrələrini də verməkdədir. Təəssüf ki, bu səmtdə araşdırmalar zamanı Azərbaycandakı bir sıra qeyri-hökumət təşkilatlarının da ciddi korrupsiya əməllərinə qurşandığı, xarici donorlardan alınmış böyük həcmdə vəsaitlərin qeyri-qanuni istifadəsi halları müəyyənləşdirilib, belə qanunsuz əməllərlə məşğul olan böyük bir şəbəkənin varlığı ortaya çıxıb. Faktlar, sübutlar, inkarolunmaz dəlillər Azərbaycanın hüquq mühafizə orqanları tərəfindən toplanıb, bu barədə AŞPA prezidenti Ann Brassörün sentyabr ayında Bakıya səfəri zamanı ona da məlumat verilib. Güman ki, istintaq prosesləri sona çatdıqdan sonra həmin məlumatlar geniş ictimaiyyət üçün də açıqlanacaq. Azərbaycan kənardan vəsaitlərin alınmasında tam şəffaflığın tərəfdarıdır. Lakin bəzi QHT-ləri şübhəli məqsədlərlə maliyyələşdirən qüvvələr belə şəffaflığın əleyhinədir. Məntiq haradadır?

QHT-lərlə bağlı qanunvericilikdə və onlarla əlaqədar istənilən digər məsələdə isə Azərbaycan müzakirələrə açıqlığını hər zaman bəyan edib. İnanıram ki, bu kimi həssas məsələlərlə əlaqədar məruzələri hazırlayarkən mətnə daxil edilən hər maddə dəqiqləşdirilməli, ölkələrə qarşı iddialar, tənqidi baxışlar faktların nə dərəcədə düzgün olması baxımından obyektivliklə ölçülüb-biçilməlidir”.

AzərTAc-ın məlumatına görə, komitə iclasında qərara alınıb ki, məruzədə adları çəkilən ölkələrdə QHT-lərlə bağlı əks olunanların dəqiqləşdirilməsi, mübahisəli məqamların aydınlaşdırılması ilə əlaqədar müvafiq rəsmi dairələrə müraciətlər edilsin.