Ancaq siyahı hazırlanır; partiya başqanlığına isə hələlik bir nəfər öz iddiasını irəli sürüb; Gülağa Aslanlı: “Sənədlərin qəbulu davam edir...” 

Xəbər verildiyi kimi, Müsavat Partiyası VIII qurultayını keçirmək üçün sentyabrın 27-nə vaxt təyin edib. Artıq bununla bağlı avqustun 28-dən etibarən seçkili orqanlara namizədlərin qeydə alınması prosesinə start verilib. Keçən 10 gün müddətində iddiasını irəli sürən və namizədliyi qeydə alınan şəxslər kifayət qədərdir.

Namizədlərin qeydə alınması prosesi həftənin bazar günü istisna olmaqla, bütün günləri səhər saat 10:00-dan başlayaraq axşam 18:00-a qədər davam edir. İddiaçı şəxs müvafiq sənədə imza atdıqdan sonra namizədliyi qeydə alınmış hesab olunur. İndiyədək əsas seçkili vəzifə olan başqanlığa yalnız bir nəfər iddiasını irəli sürüb. Bu, Müsavat Divanının üzvü Tural Abbaslıdır. Digər şəxslərin də başqanlığa namizəd olacağı istisna deyil.

Müsavat başqanının müavini Gülağa Aslanlı qəbul edilmiş qaydalara uyğun olaraq, namizədlərin qeydə alınması prosesinin davam etdirildiyini bildirdi: “Hazırda seçkilərlə bağlı qəbul edilmiş qaydalara heç bir dəyişiklik edilmədən proses həyata keçirilir. Sənədlərin qəbulu davam etdirilir. İndiyə qədər bir nəfər başqanlığa (Tural Abbaslı), 9 nəfər MNTK-na, 50-yə yaxın şəxs isə sərbəst Məclis üzvlüyünə iddiasını irəli sürüb”.

Partiya funksioneri qurultaya kimlərin dəvət olunması ilə bağlı yekun qərarın verilmədiyini də qeyd etdi: “Çünki bununla bağlı yekun qərar verilməyib. Siyahılar hazırlanır. Ola bilsin ki, növbəti yığıncaqların birində bu məsələ həll olunsun”.