Firuzə Həsənzadə

Dünya fitnə içində əziyyət çəkir. İnsan canına qıymağın vərdişə çevrildiyi və bəsitləşdiyi bu dövrdə,  artıq kütləvi şəkildə törədilən qətllər adi hal kimi qəbul edilir. Uşaq, yaşlı, qadın demədən məsum və günahsız canlar bu fitnənin qurbanı olurlar...

Əvvəllər nadir hallarda cinayət xəbərləri ilə rastlaşdığımız halda, indi demək olar ki, cinayətlər, kütləvi qətliamlar, terror aktları bütün gündəmi zəbt edir. Əxlaqi pozuntu  bütün dünya üçün bir bəlaya çevrilib. Birinin sözü digərinin boğazından keçmir, biri digərini nalayiq sözlərlə təhqir edir, ər arvada, arvad ərə xəyanət edir, 5-10 manat üçün silah çəkilir. Nəticə isə: tükürpərdici qətllər. Hətta cinayətkarlar belə törətdikləri cinayəti rahatlıqla, soyuqqanlılıqla danışırlar.

Bəs nə üçün cana qıymaq bu qədər adiləşib? Bir insanı vəhşicəsinə öldürmək niyə bu qədər normal hal alıb? İnsan canı niyə bu qədər ucuzlaşıb? Yəqin ki, bir çoxumuz bu sualları düşünürük. Xəbərləri izləyirik və belə hadisələrlə tez-tez rastlaşırıq. Təbii ki, mətbuatın vəzifəsi xəbərləri çatdırmaqdır və törədilən hər bir cinayət dövlət qarşısında, qanun-hüquq qarşısında cəzasız qalmır. Ancaq dünyanı bürüyən bu fitnənin mütləq köklü həll yolu olmalıdır .

Dünyada  sevgisizliyin, etibarsızlığın, ədalətsizliyin, kinin, nifrətin hakim olması, insanların tez-tez öz həyatlarından şikayət etmələri, cinayətlərin, həm daxili, həm də xarici münaqişələrin, ümumilikdə dünya üzərində fitnələrin artması insanların Allah'dan uzaqlaşmalarına, Allah'a təslim olmamalarına görədir. Hal-hazırda müsəlman aləminin məruz qaldığı zülmün əsas səbəbi Quranı tərk edib Allah'ın Quranda buyurduğu birlik, qardaşlıq ittifaqını qurmaq üçün cəhd göstərməmələridir. Allah insanlara xoşbəxt və dinc yaşamağın yollarını Quranda bildirmişdir: Bir insan ancaq Allah'a yönəldiyi və Onunla dost olub, Rəbbimizin bəyəndiyi əxlaqı yaşadığı halda çətinliklərindən xilas ola bilər. Müsəlmanlar Allah'ın Quranda buyurduğu əsl İslamı yaşamaqla mükəlləfdirlər.

Çəkilən acıların bitməsi, dünyanın sülhə və rifaha qovuşması üçün müsəlmanların Allah'ın “Allah’ın ipinə möhkəm sarılın və dağılıb ayrılmayın…” (Ali İmran surəsi, 103) hökmünün tələbi olaraq bir an öncə birləşib İslam Birliyini qurmaları  vacibdir. Müsəlmanların birlik olması, qan bağlılığı olan qardaşlar kimi, hətta daha da güclü şəkildə bir-birinə bağlanması fərzdir.

Bunun üçün gələcək nəsil doğru maarifləndirilməlidir və bu işdə də ən böyük məsuliyyət təhsilin üzərinə düşür. Təhsilimiz o qədər güclü olmalıdır ki, gələcəyimiz olan uşaqlar doğrunu yanlışdan, yaxşını pisdən ayırd edəcək qədər ağıllı olsunlar. İnsanın heyvan növündən əmələ gəlmədiyini, məhz Allah'ın diləməsi ilə yoxdan yaradıldığını, həmçinin başıboş buraxılmadığını və etdiklərinə görə hesaba çəkiləcəyini dərk etsinlər.

Bu fitnədən həm dünyanın, həm də gələcək nəslimizin qurtulması üçün insanlara ən gözəl əxlaq olan Quran əxlaqını öyrətməliyik. Belə ki, insanlar nə üçün var olduğunu, niyə yaşadığını anlamalı, görüb-eşitdiyi, dediyi  hər sözdən belə məsul olduğunu  bilməlidirlər.

Quran əxlaqında nə çirkin sözə yer var, nə də terror, şiddət və zorakılığa. Quranda bu əməllər  lənətlənir. Quran əxlaqı yer üzünə sevgi, şəfqət, mərhəmət, sülh, dostluq, qardaşlıq, dinclik, gözəllik, ədalət, həm maddi, həm də mənəvi zənginlik gətirəcək. İnsanlar axtardığı mənəvi rahatlığı, gözəl həyatı məhz Quran əxlaqını yaşamaqla əldə edəcəklər. Çünki Quran əxlaqını yaşamağın nəticəsi əmin-amanlıq və xoşbəxtlikdir.