Astarada Azərbaycan və İran arasında iqtisadi, ticarət və humanitar məsələlər üzrə birgə komissiyanın həmsədrləri, Azərbaycanın İqtisadiyyat və sənaye naziri Şahin Mustafayev və İranın Rabitə və informasiya texnologiyaları naziri Mahmud Vaezinin iştirakı ilə 2 ölkənin nümayəndə heyətinin görüşü keçirilib.

ANS PRESS-in məlumatına görə, görüşdə Şimal-Cənub nəqliyyat dəhlizinin reallaşdırılması ilə bağlı müzakirələr aparılıb. Müzakirələrin ilkin mərhələsindən sonra birgə komissiyanın həmsədrləri Şahin Mustafayev və Mahmud Vaezi jurnalistlərə açıqlama verib.

İqtisadiyyat və sənaye naziri Ş.Mustafayev Azərbaycan-İran əlaqələrinin uğurla inkişaf etdiyini, bu uğurların təməlində isə Azərbaycan və İran prezidentlərinin siyasi iradəsinin dayandığını söyləyib. Nazir bildirib ki, əlaqələr çoxşaxəlidir, siyasi əlaqələr də yüksək səviyyədədir. Azərbaycan-İran əlaqələri energetika, nəqliyyat, maliyyə, ticarət və digər sahələrdə inkişaf edir: "Bugünkü iclasın əsas məqsədi Azərbaycan və İran ərazisindən keçən Şimal-Cənub beynəlxalq nəqliyyat dəhlizinin səmərəliliyinin artırılması ilə bağlı danışıqların aparılması, birgə layihələrin hazırlanması və bu istiqamətdə işlərin görülməsidir. Hər iki ölkənin yüksək rəsmilərinin iştirakı ilə çox məhsuldar görüş oldu".
Şahin Mustafayev bildirib ki,Şimal-Cənub nəqliyyat dəhlizinin səmərəliliyinin artırılması hər iki ölkənin tranzit imkanlarının artmasına gətirib çıxaracaq və siyasi,iqtisadi baxımdan dividendlər gətirəcək: "Bugünkü müzakirələrin nəticəsi olaraq müvafiq işçi qruplarının yaradılması qərara alındı. Əməkdaşlarımız bu gün də danışıqlar aparacaqlar. Danışıqların nəticəsi olaraq razılaşdırdığımız layihələrlə bağlı müvafiq qərarlar qəbul ediləcək və layihələr üzrə nümayəndələrə müvafiq tapşırıqlar veriləcək. İnanırıq ki, aparılacaq müzakirələr nəticəsində, səylərimiz nəticəsində gələcəkdə Şimal-Cənub nəqliyyat dəhlizinin səmərəliliyinin artırılması üçün işlər görüləcək".

İranın Rabitə və informasiya texnologiyaları naziri Mahmud Vaezi jurnalistlərə açıqlamasında layihənin reallaşmasının iş adamları üçün faydalı olacağını bildirib:"Şimal-Cənub beynəlxalq nəqliyyat dəhlizi iki ölkənin tranzit xətlərini birləşdirməklə bərabər, Hindistandan tutmuş Avropayadək yük daşımalarının daha tez və daha sərfəli şəkildə həyata keçirilməsi üçün şərait yaradacaq”.

Müzakirələr bu gün eyni tərkibdə İranın Astara şəhərində davam etdiriləcək.