Onlar ETTELAAT məmurları tərəfindən cismi və ruhi təzyiqlər altında sorğu-suala tutulublar 

Savalan dağının sığınacaq məntəqəsində İranın təhlükəsizlik qüvvələri tərəfindən həbs edilən fəallardan Səccad İbrahimpur sərbəst buraxılıb. GunAzTV-nin xəbərinə görə, Həmid Qüvvəti və Rza Qüvvəti tutulduqdan 3 gün sonra 100 milyon riallıq mülki vəsiqə qarşılığında və İsa Əzizi keçirdiyi aclıq aksiyasının ikinci günündə, yəni tutulduqdan 4 gün sonra azadlığa çıxıb.

Həbib Nigəhban isə aclıq aksiyasının 4-cü günü, yəni tutulduqdan 1 həftə sonra 100 milyonluq mülki vəsiqə qarşılığında sərbəst buraxılıb. ETTELAAT (İran Kəşfiyyat Nazirliyi) məmurları isə Ərdəbildə Həbib Nigəhbanın evində axtarış aparıb və azərbaycanlı fəala aid kitablar və bir sıra şəxsi əşyanı özləri ilə aparıblar. Rəhim Qulami tutulduğu gündən aclıq aksiyasına başlayıb, lakin astma və böyrək xəstəlikləri səbəbindən və digər fəalların israrı ilə aclıq aksiyasının 4-cü günü aksiyanı dayandırıb. R.Qulami bundan öncə də dəfələrlə tutuqlanıb və həbs olunub.

Cəfər Rüstəmirad Ərdəbil zindanına aparıldıqdan sonra bu şəhərin ETTELAAT şöbəsinin təcridxanasına göndərilib. O, tutulduğu gündən aclıq aksiyasına başlayıb. Azərbaycanlı fəal bu müddətdə yalnız bir dəfə öz ailəsi ilə qısatelefon əlaqəsi saxlamağa nail olub və aclıq aksiyasını davam etdirdiyini bildirib. Fəalın ailəsi isə onun danışıq zamanı halsız olduğu və telefonun gözlənilmədən kəsilməsi səbəbindən, fəalın işgəncələr altında saxlandığını ehtimal edirlər.

Səid Hüseyni iki gün öncə öz ailəsi ilə qısa telefon əlaqəsi saxlayıb və hələ də aclıq aksiyasını davam etdirdiyini və ETTELAAT məmurları tərəfindən cismi və ruhi təzyiqlər altında sorğu-suala tutulduğu bildirib. Məlumata görə, fəalınmobil telefonu yaxalanarkən məmurlar tərəfindən döyüldükləri səbəbindən qırılıb. S.Hüseyni keçən aylarda da Ərdəbilin ETTELAAT şöbəsində saxlanılıb və sonra vəsiqə qarşılığında sərbəst buraxılıb.

Aydın Zakir yaxalanarkən məmurların qanunsuz hərəkətinə etiraz olaraq avtomobilə minməkdən imtina edib. Sonra məmurlar gözyaşardıcı qazdan istifadə edib və ona qarşı zorakılığa başlayıblar, məhz bundan sonra milli-mədəni fəalı avtomobilə mindirmək mümkün olub. Fəal tutulduğu gündən aclıq aksiyasına başlayıb və hələ də davam etdirir. A.Zakir bundan öncə də dəfələrlə tutuqlanıb və müxtəlif təzyiqlərə məruz qalıb.
Aylar öncə onlarla fəalla birlikdə tutuqlanan və vəsiqə qarşılığında sərbəst buraxılan Meysəm Colani də tutulduğu gündən aclıq aksiyasına başlayıb. O, 4 gün sonra aclıq aksiyasını dayandırıb. Həsən Colanin isə bundan öncə saxlandığı söylənilmir. O tutulduğu gündən aclıq aksiyasındadır və öz ailəsi ilə telefon əlaqəsi saxlayarkən ağır vəziyyətdə olduğunu bildirib.
musavat.com