Azərbaycan Respublikası Dövlət Neft Şirkətinin vitse-prezidenti Mikayı İsmayılov Prezident Administrasiyasının qəzəbinə gəlib.

Bu haqda Teleqraf.az-a  məlumat verən mənbənin dediyinə görə, Ağsu rayonunda Mikayıl İsmayılovun adamları tərəfindən torpaqları əllərindən alınmış sakinlərin dövlət baçısına etdikləri şikayət məktubları bu məsələlərin araşdırılmasına rəvac verib. Ağsu rayonunun Hacıqədirli kəndinin 20-dən çox sakini Mikayıl İsmayılovun adamları tərəfindən icarə adına mənimsənilən torpaqlarının geri qaytarılması üçün Prezident İlham Əliyevə müraciət ediblər. Sakinlərin bildirdiklərinə görə, Mikayıl İsmayılovun adamları onları aldadaraq güya ki, torpaqlarını icarəyə götürdüklərini, orda iş yerlərinin açılacağını, onların da orda işləyəcəklərini deyiblər. Ancaq heç bir iş yeri açılmayıb və sakinlərin əkin torpaqları əllərindən çıxıb. Mikayıl İsmayılov haqqında prezidentə şikayət edən şikayətçilər torpaqlarının geri qaytarılmasını tələb edirlər.

Ağsu rayonunun Axundlu kənd sakini olan qocaman müəllim Səfa İsmayılov da torpaqları Mikayıl İsmayılov tərəfindən zəbt olunan insanlardan biridir. Səfa İsmayılovun Teleqraf.az-ın əməkdaşına verdiyi məlumata görə, onun illərlə əziyyət çəkib ərsəyə gətirdiyi fermer təssərrüfatı uzun sürən sifarişli məhkəmə süründürməçiliyi ilə əlindən alınaraq məhv edilib. Səfa İsmayılov bildirib ki, Mikayıl İsmayılovun yaxın qohumları onun fermasını onlara satmaq üçün onunla görüşüblər, o torpağını satmağa razı olmadığı üçün ciddi faciələrlə üzləşib. Onun içində 3 tövləsi, çoban evləri olan 137 hektar torpağı Mikayıl İsmayılovun adamları tərəfindən əlindən alınıb və  traktorun qarşısına salınaraq  uçurulub. Bu təzyiqlərə dözməyən oğlu ağr xəstəliyə tutularaq dünyasın dəyişib.Səfa İsmayılovun dediyinə görə, oğlunu İran İslam respublikasına müalicəyə apardığı zaman orda eşidib ki,ferması SOCAR-ın vitze-prezidentinin adamları tərəfindən sökülüb. Bundan sonra onun həyat yoldaşı da ağır xəstəliyə düçar olaraq yatağa düşüb.

Mikayıl İsmayılov haqqında olan kütləvi şikayətlərdən sonra Prezident Administrasiyasından şikayət ərizələrinə baxmaq üçün Ağsu rayon icra hakimiyyətinə göstəriş verilib. Ağsu rayon icra hakimiyyəti bu məsələləri diqqətə alıb. Əldə etdiyimiz məlumata görə şikayətçilər Ağsu rayon icra hakimiyyətinə çağırılıb və aidiyyəti şöbənin əməkdaşları tərəfindən dinlənilərək problemlərinin həll ediləcəyi barədə vəd verilib. Kənd sakinlərinin bildirdiyinə görə,Mikayıl İsmayılov bir həftədir ki, Ağsu rayonunun Çiyni kəndində olan villasından çölə çıxmır.

P.S. Tərəfimizdən bildiririk ki, müstəqil mətbuat orqanı olaraq məsələni özümüz də diqqətimizdə saxlayacağıq.Qarşı tərəfin mövqei olarsa onu da dərc etməyə hazırıq.

Elşən Əlisoy